قىتاي دەلەگاتسياسى استاناعا قۇندى مادەني بۇيىمدارىن الىپ كەلدى
وسى شاراعا ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن ق ح ر مادەنيەت ۆيتسە-ءمينيسترى سيان چجاولۋن قاتىستى.
«بۇگىن ءبىز قىتايدىڭ فارفور ونەرى كورمەسىنىڭ سالتاناتتى اشىلۋى راسىمىنە جينالىپ وتىرمىز. قازىرگى تاڭدا قازاقستان مەن ق ح ر اراسىندا مادەني-گۋمانيتارلىق سالالارداعى ىنتىماقتاستىق قاتىناستار قارقىندى دامىپ كەلەدى. جىل سايىن ەكى ەل اراسىندا ءارقيلى تاقىرىپتاعى كورمەلەر، سەمينارلار، كونسەرتتىك باعدارلامالار جوعارى دەڭگەيدە وتكىزىلۋدە. بۇگىنگى وتكىزىلىپ جاتقان شارانى دا ەكى ەل اراسىنداعى جەمىستى ىنتىماقتاستىقتىڭ تاعى ءبىر ايعاعى دەپ ايتۋعا بولادى»، - دەدى مينيستر ا. مۇحامەدي ۇلى.
كورمەلەردە قىتايدىڭ ەكسكليۋزيۆتى، زاماناۋي، قولدان جاسالعان فارفور بۇيىمدارى، كەراميكا قولونەرى مەن ەكومادەنيەتىنىڭ سۋرەتتەرى كوپشىلىك نازارىنا ۇسىنىلدى.
«كورمەگە 80 نەن استام كەرەمەت ۇلگىدەگى فارفورلار مەن قىزىل سازدان جاسالعان بۇيىمدار ۇسىنىلىپ وتىر. بۇل مادەني شارا 14- قازانعا دەيىن جالعاسادى»، - دەدى قىتايلىق دەلەگاتسيانىڭ وكىلى.
ايتا كەتەيىك، مادەنيەت كۇندەرى اياسىندا «استانا وپەرا» تەاترىنىڭ ساحناسىندا، سونداي-اق اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا ق ح ر ونەر شەبەرلەرىنىڭ گالا-كونسەرتتەرى وتەدى.
اۆتور: رۋسلان عابباسوۆ
