ازيا ويىندارىندا حيدجاب كيگەنى ءۇشىن جارىستان شەتتەتىلدى
بۇل جولى داۋ كاتار قۇراماسىنان شىعىپ وتىر. بۇل ەلدىڭ باسكەتبولدان ايەلدەر قۇراماسى ۇيىمداستىرۋشىلاردىڭ حيدجاب كيىپ ويناتپاعانى ءۇشىن ينچحوندى وزگە قۇرامالارعا قاراعاندا ەرتە تاستاپ كەتتى.
نەگىزى كاتار قۇراماسى سەيسەنبى كۇنى موڭعوليا قۇراماسىنا قارسى ويناۋى كەرەك ەدى. الايدا، ۇيىمداستىرۋشىلار ارابيا تۇبەگىنىڭ شىعىسىندا ورنالاسقان كاتار قۇراماسىنىڭ باسكەتبولشى قىزدارىنا حيدجابپەن كورتكا شىعۋىنا رۇقسات بەرمەدى. ءسويتىپ ول كەزدەسۋدە موڭعوليا قۇراماسى تەحنيكالىق جەڭىسكە جەتكەن ەدى.
كەيىن كاتار قۇراماسى نەپال جانە قازاقستان قۇرامالارىمەن كەزدەسۋ وتكىزۋ كەرەك بولاتىن. ءبىراق قۇرامانىڭ باپكەرلەر قوسىنى بۇل كەزدەسۋلەردىڭ الدىندا رەسمي تۇردە ازيا ويىندارىنان شىعاتىنىن مالىمدەدى. ال، بۇل ىسكە قاتىستى ۇيىمداستىرۋشىلار تاراپى ءالى رەسمي تۇسىنىكتەمە بەرگەن جوق.
ورايى تۇسكەندە ايتا كەتەيىك، ازيا ويىندارى تاريحىندا تۇڭعىش رەت قازاقستان دەلەگاتسياسىنىڭ دا باسى داۋعا ۇشىراپ قالدى. داۋدىڭ ورتاسىندا قالعان مەدەت ءابجانوۆ. ۋشۋدان قازاقستان قۇراماسىنىڭ باپكەرىن ۇيىمداستىرۋ كوميتەتى كورەيادان قۋىپ جىبەردى.
قولداعى بار مالىمەت بويىنشا، ءابجانوۆ ازيا ويىندارى بارىسىندا جارىس ءوتىپ جاتقان جەردەگى ەرىكتى قىزعا تيىسكەن. كەيىن ەرىكتى قىز ۇيىمداستىرۋشىلارعا كەلىپ شاعىم جازعان. سول ساتتە-اق شاعىمدى قاراستىرعان ۇيىمداستىرۋشىلار مەدەت ءابجانوۆتى ەلدەن قۋۋ تۋرالى شەشىم شىعارىپ، سەيسەنبى كۇنى ينچحوننان قايتارىپ جىبەرگەن.
رەسپۋبليكالىق ۋشۋ فەدەراتسياسىنىڭ ۆيتسە-پرەزيدەنتى باقىت احمەتوۆتىڭ ايتۋى بويىنشا، بۇل ماسەلە ق ر ۇلتتىق وليمپيادالىق كوميتەتتىڭ باسشىسى تەمىرحان دوسمۇحامبەتوۆ ەلگە كەلگەن سوڭ قارالادى.
اۆتور: ۋاليحان قوسانباي
