فرانسۋز اسپازدارى قازاقستاندىق ماماندارعا تاعامتانۋ مادەنيەتىنىڭ قۇپياسىن كورسەتەدى
«27- قىركۇيەكتە رەسپۋبليكا الاڭىندا فرانسۋز ازىق-تۇلىك ونىمدەرىنىڭ جارمەڭكەسى وتەدى. شارا اياسىندا قازاقستاندىق اسپازدارعا كۋلينارلىق شەبەرلىك سىنىبى دا ۇيىمداستىرىلادى. كورسەتىلەتىن تاعامداردىڭ ءبىر ءتۇرى - فرانسۋز «بەشبارماعى». تەك قامىرسىز. كوكونىستەردەن جاسالعان»، - دەدى روجە دانيەل.
اسپازدىق مەيرامى فرانسۋز تاعامدارىنىڭ فەستيۆالى اياسىندا وتپەك. فرانسيانىڭ قازاقستانداعى باس كونسۋلى پاتري رەناردىڭ ايتۋىنشا، مەيرام تەك قازاقستاندا عانا ەمەس، الەمنىڭ بارلىق ەلدەرىندە ءوتىپ جاتىر.
«ءبىز قازاقستان حالقىن فرانسۋز اسپازدىعىمەن، تاعامتانۋ مادەنيەتىمەن تانىستىرعىمىز كەلەدى. شاقىرىلعان مامانداردىڭ بارلىعى ءوز ەلىندە بەلگىلى ادامدار»، - دەدى كونسۋل.
ر. ءدانيەلدىڭ ايتۋىنشا، كۋليناريا تەحنيكاسىن مەڭگەرگەن ەسكوۆەنىڭ ءىزباسارلارىنىڭ اراسىندا «فاۆور» مەيرامحاناسىنىڭ اسپازشىسى ايدىن دا بار.
«ايدىن بولاشاقتا ەسكوۆەنىڭ قىزىل شارف يەگەرى اتانۋى مۇمكىن. بۇل اتاققا كونديتەرلىك، نان ونىمدەرىن پىسىرەتىن ماماندار يە بولادى. سونداي-اق، 2017-جىلى اسپازدىق بويىنشا وتەتىن چەمپيوناتتا قازاق اسپازدارى دا قاتىسادى دەگەن ءۇمىتىمىز بار»، - دەدى ول.
ەرەكشە ايتاتىن ءبىر جايت، فرانسۋز اسپازدىق ونەرى مەن تاعام قابىلداۋ مادەنيەتى يۋنەسكو-نىڭ ماتەريالدىق ەمەس مۇرالارى قاتارىنا الىنعان.
اۆتور: گۇلميرا ءعوسمانالي
