قازاقستاندا العاش رەت ەڭبەك كۇنى اتاپ وتىلەدى

استانا. قازاقپارات - وسى جەكسەنبىدە العاش رەت قازاقستاندا ەڭبەك كۇنى اتاپ وتىلەدى. بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى داۋلەت ارعاندىقوۆ ايتتى.

ونىڭ اتاپ وتۋىنشە، وتكەن جىلدىڭ 22- قاراشاسىندا ەلباسىنىڭ جارلىعىمەن ەڭبەك كۇنى بەكىتىلگەن. اعىمداعى جىلى بۇل مەرەكە قىركۇيەك ايىنىڭ سوڭعى جەكسەنبىسىندە العاش رەت اتالىپ وتەتىن بولادى. ال وسى مەرەكە قارساڭىندا، ەرتەڭ ەلورداداعى قازاقستان تاريحى مۇراجايىنىڭ عيماراتىندا رەسپۋبليكالىق اۋقىمداعى فورۋم وتەتىن بولادى.

«فورۋم بارىسىندا ەكونوميكانىڭ ءتۇرلى سالالارىنداعى الدىڭعى قاتارلى جۇمىسشىلاردى «ەڭبەك ارداگەرى» مەدالىمەن ماراپاتتاۋ قاراستىرىلىپ وتىر. ولاردىڭ قاتارىندا ەنەرگەتيكا سالاسىنىڭ، كومىر ءوندىرىسىنىڭ، اۋىل شارۋاشىلىعى، تاۋ-كەن، مۇناي-گاز كەشەنى، تۇرعىن ءۇي قۇرىلىسى، ماشينا جاساۋ، ءبىلىم بەرۋ، دەنساۋلىق ساقتاۋ، الەۋمەتتىك سالالاردىڭ ماماندارى بار»، - دەدى ۆيتسە-مينيستر.

ونىڭ سوزىنە قاراعاندا، بۇل فورۋمعا ەلىمىزدىڭ وڭىرلەرىنەن ارنايى دەلەگاتتار قاتىساتىن بولادى. قازىرگى ۋاقىتتا دەلەگاتتار ەلورداعا كەلىپ جاتىر. دەلەگاتتاردىڭ باسىم بولىگى ءوز سالاسىندا زور جەتىستىككە جەتكەن ماماندار.

اۆتور: مارلان جيەمباي