پارلامەنتتىڭ وزىندە زاڭداردى مەملەكەتتىك تىلدە قاراۋعا تولىق جەتە الماي ءجۇرمىز - ق. سۇلتانوۆ
ءتىل توڭىرەگىندەگى تاقىرىپقا توقتالعان پارلامەنت ءماجىلىسىنىڭ دەپۋتاتى قۋانىش سۇلتانوۆ، بۇل ماسەلەدە ەڭ الدىمەن مەملەكەتتىڭ قۇزىرلى ورگاندارى ۇلگى بولۋى كەرەكتىگىن اتاپ ءوتتى. «ەلباسى ءوزىنىڭ ءاربىر سوزىندە مەملەكەتتىك قىزمەتكەرلەردىڭ حالىققا قاتىستى قىزمەت دەڭگەيىن ساپالاندىرۋدى ۇدايى ايتىپ كەلەدى. بۇل تۇرعىدان الساق، مەملەكەتتىك تىلگە تەك جينالىستار جۇرگىزۋ دەڭگەيىندە عانا ەمەس، حالىقپەن بايلانىسۋ، قۇجاتتاردى دايىنداۋ تۇرعىسىنان دا ماڭىزدى. ويتكەنى، ءبىز قازىرگى كۇنى پارلامەنتتىڭ وزىندە زاڭداردى مەملەكەتتىك تىلدە قاراۋعا تولىق جەتە الماي ءجۇرمىز»، - دەدى ق. سۇلتانوۆ.
سونىمەن بىرگە، دەپۋتات مەملەكەت جۇمىسىندا رۋحاني دارەجەنى كوتەرۋگە كوپتەگەن شارالار اتقارىپ جاتقانىن، قىرۋار قاراجاتتار بولىنگەنىن دە اتاپ ءوتتى. ونىڭ پايىمىنشا، مەملەكەتتىك ءتىلدى دامىتۋ، كەڭىنەن پايدالانۋ جاعىمدى كورسەتكىشكە اينالىپ بارادى.
«ورىس ءتىلى تۇرعىسىنان قازاقستاندا ەشقانداي قيىندىق تا، ماسەلە دە جوق. قازاقتاردىڭ باسىم بولىگى «تۋا سالا» ورىسشا سويلەپ تە جاتىر. شىندىعىندا، ورىس ءتىلى ءبىزدىڭ رۋحاني بايلىعىمىز. وسى جاعىنان الساق، قازاقتار ەشقاشاندا ورىس تىلىنەن باس تارتا المايدى، ولار ورىس ءتىلىن، ونىڭ بايلىعى مەن مۇمكىندىكتەرىن يگەرۋدى ودان ءارى جالعاستىرا بەرەدى. بۇعان قوسىمشا اعىلشىن ءتىلىن جاستارىمىز يگەرىپ جاتىر. بۇعان دا پرەزيدەنت نازار اۋدارعان بولاتىن. جالپى، ادام بالاسىنىڭ ءتىلى - ونىڭ اناسىنىڭ ءتىلى. ەندەشە، انا تىلگە قۇرمەت كورسەتە وتىرىپ، قوسىمشا تىلدەردى يگەرۋگە جاعداي جاسالۋى شارت»، - دەدى ق. سۇلتانوۆ.
«الەمدە اعىلشىن ءتىلىنىڭ ۇستەمدىگى بولعاندىقتان، ودان دا باس تارتا المايمىز. بۇل ءتىلدى ءبىلۋ ءبىزدىڭ ازاماتتارىمىزعا ءوز ەلىمىزدەن تىسقارى جەرلەردەگى بيىك دەڭگەيگە كوتەرىلۋىنە ىقپال ەتەدى. سوندىقتان دا، بۇل ساياسات دۇرىس، ودان پىكىرتالاستار جاساي بەرگەنشە، جاعداي جاساعان ءلازىم. سوسىن مەملەكەتتىك ءتىلدىڭ دامۋىن تەك ۇكىمەتتەن كۇتىپ وتىرۋ دا دۇرىس ەمەس. ونى كەز كەلگەن ادام ءوزىنىڭ ساناسىمەن ءتۇيسىنىپ، جاۋاپكەرشىلىك الۋى كەرەك. ءوزىنىڭ اتا-اناسىنا قانداي جاۋاپكەرشىلىكپەن قاراسا، تىلگە دەگەن جاۋاپكەرشىلىك تۋرا سونداي بولۋى كەرەك»، - دەدى ول.
اۆتور: قانات مامەتقازى ۇلى
