تاتيانا پولتاۆسكايا: قازاقتىڭ تاۋلارى تۇسىمە كىرەدى

استانا. قازاقپارات - پوەزيا كەشىندە قازاق ك س ر-نىڭ مادەنيەت سالاسىندا ەڭبەگى سىڭگەن قايراتكەرى تاتيانا پولتاۆسكايا حانىممەن از-كەم تىلدەسۋدىڭ ءساتى ءتۇستى.

قازاقتىڭ «ءۇش توتى» دەپ اتاپ كەتكەن تالانتتى ونەرپاز قىزدارىنىڭ ءبىرى «ايقىن» گازەتىنە ارنايى سۇحبات بەردى.

- تاتيانا، ءسىزدى قازاق حالقى ايگىلى «ءۇش توتى»-نىڭ ءبىرى دەپ قاتتى جاقسى كورەدى. ەلدى ساعىناتىن شىعارسىز؟

-  وي، ساعىنعاندا، ايتپاڭىز. كەيدە قازاقتىڭ تاۋلارى تۇسىمە كىرەدى. ەلدەن كەتكەنىمە باقانداي 25 جىل بولىپتى. ءبارى دە كۇنى كەشە عانا سياقتى ەدى. ساحنا تابالدىرىعىن يمەنە اتتاعانىم دا كەشە سياقتى. ءبىراق ۋاقىت دەگەن جۇيرىك ەكەن.

- بىلتىر تاتيانا بۋرميستروۆا وتكىزگەن كەشكە ماسكەۋدەن ارنايى ۇشىپ كەلدىڭىز. اسەرىڭىز قانداي بولدى؟

- ويپىر-اي، سول كەشكە بارا الام با، جوق پا دەپ قاتتى قوبالجىدىم. جۇمىستان شىعۋدىڭ رەتى وڭاي بولمادى. كەسىمدى ۋاقىت بەلگىلەنىپ قويعان. بارماسام، ەلدەن ۇيات. سودان بارىنە تاۋەكەل ەتىپ، جولعا دەرەۋ شىقتىم دا، ەلگە تارتتىم. قىزىمدى دا ەرتە كەلدىم. قىزىم كونسەرتكە جينالعان حالىقتىڭ ىقىلاسىن كورىپ، وسى كۇنگە دەيىن تامسانا ءسوز ەتەدى. «ءسىزدى تاپ ءبىر حانشايىم سەكىلدى كۇتىپ الدى عوي، مەن مۇندايدى كۇتپەپ ەدىم» دەپ ءالى كۇنگە شەيىن ايتا بەرەدى. ءسىزدىڭ «ايقىن» گازەتىڭىز مەنەن سۇحبات الىپ، ادەمىلەپ بەرگەن ەكەن. گازەتتىڭ سول ءنومىرىن جۇرەگىمنىڭ تۇسىنا باسىپ قويامىن. ۇيدەگىلەر دە كەلگەندەرگە ۇلكەن ماقتانىشپەن كورسەتەدى. قازاق حالقىنىڭ ماعان دەگەن قۇرمەتىنە شەكسىز ريزامىن.

- قىزىڭىزدى قىدىرتا الدىڭىز با؟

- قىزىم الاتاۋدى كورىپ، عاشىق بولىپ قالدى. ءبىراق مەن وعان ناعىز تاۋ مەن جازيرالى جايلاۋدى كورگىڭ كەلسە، تالدىقورعان وبلىسى، گۆارديا اۋدانى، ارالتوبە اۋىلىنا - مەنىڭ تۋىپ-وسكەن جەرىمە اپارايىن، كەرەمەتتىڭ ءبارى سول جەردە دەدىم. اماندىق بولسا، كەلەسى جىلى قازاقستانعا بارىپ، ارنايى كونسەرت وتكىزگىم كەلەدى. ەل-جۇرتتى قاتتى ساعىندىم، تۋعان جەرىمە بارىپ، ماۋقىمدى باسسام دەيمىن.

- وندا ءسىزدى ساعىنعان جۇرتتان ءسۇيىنشى سۇراي بەرۋگە بولادى ەكەن عوي. ونەر جولىڭىزدا كەزدەسكەن قازاقتاردان ەسىڭىزدەن كەتپەيتىن تۇلعالاردى اتاي الاسىز با؟

- «وتىرار سازى» ءانسامبلىنىڭ جەتەكشىسى نۇرعيسا تىلەنديەۆتى ولسەم دە ۇمىتا الام با؟ قانداي كەرەمەت كىسى ەدى! ول كىسىنىڭ ونەرگە دەگەن، ونەرپازعا دەگەن تالابى ەرەكشە ەدى عوي. روزا ۇمبەت قىزى باعلانوۆا شە؟ مەنىڭ ماڭدايىمنان سيپاپ، ساحنا تورىنە جەتەكتەپ شىققان جانداردىڭ ىشىندەگى اياۋلى جان ەدى. مەن نۇرعالي نۇسىپجانوۆپەن بىرگە وركەستردىڭ سۇيەمەلدەۋىمەن «سارجايلاۋدى» ايتاتىنمىن. قانداي عاجاپ پارتنەر بولدى. ديريجەر تولەپبەرگەن ابىراشيەۆتىڭ ەسىمىن دە اسا ۇلكەن قۇرمەتپەن ەسكە الامىن. ايتا بەرسەم، مەنىڭ ومىرىمدە ولشەۋسىز ءىز قالدىرعان جاندار جەتكىلىكتى، بارىنە دەگەن العىسىم مەن قۇرمەتىم شەكسىز.

- قازىرگى جاعدايىڭىز قالاي؟ باسقا نە ايتاسىز؟

- اللاعا شۇكىر! تاعدىر ماعان قازاقستاندا تۋىپ-وسكەنمەن، ماسكەۋدە ءومىر ءسۇرۋدى جازعان ەكەن. وسىنىڭ وزىنەن ءوزىمنىڭ ميسسيامدى ايقىنداپ العاندايمىن. ماسكەۋ ۇكىمەتىندە قازاق پەن ورىس حالقى اراسىنداعى دوستىق شارالاردى تەرەڭدەتە تۇسۋگە بارىنشا اتسالىسىپ ءجۇرمىن. قازاق ەلىن ەشقاشان ۇمىتپايمىن، ءبىر ءسات بولسا دا ەسىمنەن شىعارمايمىن. دوستىققا دانەكەر بولۋدان ارتىق نە بار؟! ەلگە مەنەن سالەم ايتا بارىڭىز، ىستىق سالەمىم مەن ىقىلاسىمدى جەتكىزىڭىز. ءبارى دۇرىس بولسا، كەلەر جىلى جۇزدەسىپ تە قالارمىز. بارشا قازاقستاندىقتارعا اماندىق پەن مىقتى دەنساۋلىق تىلەيمىن!

- راحمەت! ءسىز دە امان ءجۇرىڭىز!

نۇرتورە ءجۇسىپ

«ايقىن»