ماڭعىستاۋلىق اداي جىلقىلارى دۇنيەجۇزىلىك ات سپورتى ويىندارىنا قاتىستى - فوتو
جالپى ات سپورتى ويىندارىنا 47 مەملەكەتتەن 947 جىلقى مالى قاتىستى. VII دۇنيەجۇزىلىك ات سپورتى ويىندارىنىڭ اشىلۋ سالتاناتى 23 - تامىزدا كانن قالاسىنىڭ ورتالىق ستاديونىندا ءوتتى.
ويىندار سارتيللي قالاسىندا (نورمانديا) ۇيىمداستىرىلدى. 47 مەملەكەتتىڭ نامىسىن قورعاعان 33 قۇرامادا 166 شاباندوز سىنعا ءتۇستى.
«جارىسقا جولداما العان 3 جىلقى ماڭعىستاۋ وبلىسىنىڭ اداي سايگۇلىكتەرى. نەگىزگى سىندا كوماندالار 160 شاقىرىمدىق ۋچاسكەدە 5 كەزەڭنەن ءوتۋى ءتيىس ەدى. تراسسا ءبىزدىڭ جىلقىلارىمىز ءۇشىن وتە اۋىر بولدى. جولدا تاۋلار دا، تەڭىز جاعالاۋى، ورماندى، باتپاقتى جەرلەر دە كەزدەستى. مۇنداي جولداردا جاراقاتتانۋ قاۋپى دە جوعارى بولدى. ءبىز، ارينە، بۇعان دايىن بولمادىق. ءبىزدىڭ جىلقىلار - ت م د چەمپيوندارى سوڭعى ءۇش جىلدا 7 ەلدىڭ: فرانسيا، بەلگيا، گوللانديا، گەرمانيا، پولشا، بەلورۋسسيا، رەسەيدىڭ اۋماعىندا بولدى. العاشقى 40 شاقىرىمدا سايگۇلىكتەرىمىز وندىقتىڭ قاتارىندا بولعان. كەيىن بىرەۋى ورماندا جاراقات السا، قالعان ەكەۋى ۆەتەرينارلىق تەكسەرىستەن وتە المادى. قالاي بولعاندا دا قۇندى تاجىريبە الدىق» ، - دەدى ق ر ات سپورتى فەدەراسياسىنىڭ ماڭعىستاۋ وبلىستىق فيليالىنىڭ ءتوراعاسى اسحات نوعايەۆ.
«بۇل ماڭىزدى جەتىستىك دەپ تە ايتۋعا بولادى. جىلقىلار جەكەمەنشىكتە بولعاندىقتان، اكىمدىك پەن ماڭعىستاۋ وبلىسىنىڭ اكىمى اليك ايداربايەۆتىڭ قارجىلىق قولداۋىمەن عانا جارىستارعا قاتىستىرىلۋدا»، - دەدى ماڭعىستاۋ وبلىسى بويىنشا ات سپورتىنىڭ اعا جاتتىقتىرۋشىسى ماناپ بيكەنبايەۆ.
جارىسقا قاتىسقان 166 شاباندوزدىڭ 38 ءى عانا مارەگە جەتتى. ال 47 ەلدىڭ ۇشەۋى عانا جارىستى ءساتتى اياقتادى. كوماندالىق ەسەپتە يسپانيا توپ جارىپ، التىن الدى. كۇمىس جۇلدە فرانسياعا، ال قولا شۆەيسارياعا بۇيىردى. جەكە سىندا شەيح حامدان بەن مۇحاممەد ءال ماكتۋم (بىرىككەن اراب امىرلىگى) الدىنا جان سالمادى.
