و ق و-دا «حالىق بانكىن» دۇرلىكتىرگەن ايەلگە جازا كەسىلدى
وبلىستىق پروكۋراتۋرادا حابارلاعانداي، شاردارا تۇرعىنى ق ر ق ك 242-بابى بويىنشا ايىپتى دەپ تانىلعان.
«ايەل ادامنىڭ ايتۋىنشا، ول بانككە كەلىپ ۇلكەن كەزەككە تاپ بولعان. بۇل ونىڭ اشۋىن كەلتىرگەن. سول سەبەپتى پوليتسياعا حابارلاسىپ، عيماراتقا جارىلعىش زات قويىلعانى جايلى حابارلاعان»، - دەدى و ق و پروكۋرورىنىڭ اعا كومەكشىسى باتىر ەرگەشوۆ.
ايەلدىڭ 3 جىلعا دەيىن باس بوستاندىعى شەكتەلدى جانە ول شامامەن 33 مىڭ تەڭگە كولەمىندەگى شىعىننىڭ ورنىن تولتىرۋى كەرەك. سوت مۇنداي جەڭىل شەشىمدى «لاڭكەس ايەلدىڭ» كوپ بالانىڭ اناسى بولعانى ءۇشىن عانا شىعارىپ وتىر.
ال تاعى ءبىر «تەلەفون لاڭكەسى» ءىستى بولدى. ەر ادام جالپى رەجيمدەگى كولونيادا ەكى جىل بويى جازاسىن وتەيدى. ول وسى جىلدىڭ شىلدە ايىندا ءوز پاتەرىنەن «جەدەل جاردەمگە» حابارلاسىپ، ءۋاليحانوۆ كوشەسىنىڭ بويىنداعى ۇيدە ادامداردىڭ تۇتقىنعا الىنعانىن جانە تەراكتى بولعالى جاتقانىن حابارلاعان.
«وقيعا ورنىنا پوليتسيا، دارىگەرلەر، ت ج د قىزمەتكەرلەرى جەتكەن. وقيعا ورنىندا جالعان حابار تۇسكەنى انىقتالدى. ەر ادام ۇستالىپ، تەرگەۋ وقشاۋلاعىشىنا قامالدى. ونىڭ بۇل ارەكەتىنەن كەلگەن زالال 36 مىڭ تەڭگەدەن اسىپ كەتتى»، - دەدى ب. ەرگەشوۆ.
پروكۋراتۋرا مالىمەتتەرى بويىنشا، بيىلعى جىلى تەرروريزم اكتىسى جايلى بەس جالعان قوڭىراۋ تۇسكەن. ونىڭ تورتەۋى شىمكەنت قالاسىندا ورىن العان.
ەسكە سالا كەتەيىك، مامىر ايىندا تاعى ءبىر «تەلەفون لاڭكەسى» سوتتالعان بولاتىن. تەمىرجول ۆوكزالىندا جارىلعىش زات قويىلعانى تۋرالى جالعان حابار تاراتقانى ءۇشىن وزبەكستان ازاماتى 3 جىلعا كولونياعا قامالدى.
