الماتىدا ءۇش جاڭا اۆتوۆوكزال سالىنادى
بۇل تۋرالى بۇگىن الماتىدا جۋرناليستەرمەن وتكەن كەزدەسۋدە الماتى قالاسى اكىمىنىڭ ورىنباسارى يۋري يلين مالىمدەدى.
«الماتى كەڭەيىپ جاتىر. سوندىقتان، قالاعا جاڭا اۆتوۆوكزالدار قاجەت. بۇل وڭتۇستىك استانانىڭ ينفراقۇرىلىمىن ەداۋىر جاقسارتۋعا سەپتىگىن تيگىزەدى. سونىمەن، جاڭا اۆتوبەكەتتەردىڭ ءبىرى الماتىنىڭ باتىس جاعىندا، قالادان شىعا بەرىستەگى قالقامان شاعىن اۋدانىنداعى اۋرۋحانا ماڭىنا سالىنادى. ول جەرگە بولاشاقتا مەترو جەلىسىنىڭ دە تارتىلاتىندىعىن ايتا كەتكىم كەلەدى. ەكىنشى ۆوكزال رىسقۇلوۆ داڭعىلى مەن قۇلجا تراسساسىنىڭ قيىلىسى ماڭىندا بوي كوتەرەدى. ال ءۇشىنشى اۆتوبەكەت الماتىدان قاپشاعاي قالاسىنا قاراي شىعا بەرىستە، ىلە اۋدانىنا قاراستى پەرۆوماي كەنتىنىڭ تۇسىنا سالىنادى»، - دەدى يۋ. يلين.
قالا اكىمىنىڭ ورىنباسارى سونداي- اق الاتاۋ اۋدانىندا، قالا بويىنشا وسىمەن ءۇشىنشى جاڭا مۋنيتسيپالدىق اۆتوبۋس پاركىنىڭ سالىناتىندىعىن جەتكىزدى. ودان باسقا، «الماتى- قورعاس» ماگيسترالدى كۇرەجولىن سالۋ جۇمىسى ودان ءارى جالعاسۋدا.
اۆتور: جاپپاربەرگەن ايبوتا
