قازاقستاندا جەمقورلىق قاشان جويىلادى؟
مەملەكەتتىك باسقارۋ جۇيەسىن جەتىلدىرۋگە باعىتتالعان زاڭ جوباسىن تالقىلاۋ بارىسىندا ق ر پارلامەنتى ءماجىلىسىنىڭ دەپۋتاتى قۋانىش سۇلتانوۆ وسىلاي دەپ مالىمدەدى.
وسى رەتتە دەپۋتاتتار: «ەلىمىزدە كوماندالىق اۋىس-تۇيىسكە قاشان توسقاۋىل قويىلادى؟»، - دەپ اشۋعا ءمىندى.
نۇرتاي سابيليانوۆ، ق ر پارلامەنتى ءماجىلىسىنىڭ دەپۋتاتى:
- ءبىزدى كەزىندە ادال ەڭبەككە باۋلىدى. ال قازىر ەلدەگى جاعداي قالاي بولىپ جاتىر؟ كوبى مەملەكەتتىڭ اقشاسىن بيزنەسكە اينالدىرۋدا.
بۇرىندارى قارماققا مايدا-شۇيدە مايشاباقتار ىلىنسە، بۇگىندە پاراقورلار ءتىزىمىن بىلدەي مينيسترلەر مەن وبلىس اكىمدەرى باستاپ تۇر. اتقامىنەر ازاماتتاردىڭ ارسىز ىسىنە حالىقتىڭ قۇلاعى ۇيرەنىپ، ەتى ءولىپ كەتكەندەي.
ءبىراق جاڭادان قۇرىلعان مەملەكەتتىك قىزمەت جانە سىبايلاس جەمقورلىققا قارسى اگەنتتىك بۇل ىسپەن شىنداپ كۇرەسۋگە بەل بۋىپتى. ۆەدومستۆو باسشىسى قايرات قوجامجاروۆ مەملەكەتتىك باسقارۋ جۇيەسىن جەتىلدىرۋدى كوزدەيتىن زاڭ جوباسىن دەپۋتاتتاردىڭ تالقىسىنا ۇسىندى.
سالانىڭ كەم-كەتىگىن جىپكە تىزگەن ماجىلىسمەندەر ءبىرىنشى كەزەكتە كوماندالىق اۋىس-تۇيىسپەن كۇرەسۋ كەرەكتىگىن ەسكەرتتى.
قۋانىش سۇلتانوۆ، ق ر پارلامەنتى ءماجىلىسىنىڭ دەپۋتاتى:
- جاڭا مينيستر، اكىم كەلىپ، اپپارات قىزمەتكەرلەرىن وزگەرتەدى. «ءوزىمنىڭ ادامدارىمدى الام»، - دەگەن ءسوز بار ەلدىڭ اراسىندا. ەشقانداي بيلىك باسىنداعى ادامنىڭ زاڭدى بۇزۋعا حاقىسى جوق.
قايرات قوجامجاروۆ، ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى:
- نەگە ءبىر باستىق تاعايىندالعان جاعدايدا باسقالارىن الىپ كەلەدى؟ ونىڭ ءبىر عانا ماقساتى بار. ول - قىلمىس جاساۋ.
سىبايلاس جەمقورلىقتىڭ كوكەسى بيلىك باسىنا كەلەتىن ازاماتتاردى سىناقتان وتكىزۋ بارىسىندا دا كەزدەسەدى. سىن ساعاتتان سۇرىنبەي ءوتۋ ءۇشىن تانىس-تامىر ىزدەپ، پاراعا جول بەرىلەتىنىن اگەنتتىك ءتوراعاسى جاسىرمادى. اكىم-قارالاردى تەستتەن وتكىزۋدىڭ تومپاق تۇستارى كوپ ەكەندىگىن اتاپ ءوتتى قوجامجاروۆ. باستى كەمشىلىك - ۇمىتكەردىڭ ادامي قاسيەتتەرى مەن ومىرلىك تاجىريبەسىنىڭ ەسكەرىلمەۋى. حالىقتىڭ قامىن كۇيتتەيتىن ازاماتتار تەوريادان تۇتىلىپ، سىناقتان سۇرىنەدى.
قايرات قوجامجاروۆ، ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى:
- جاسىراتىن ەشتەڭەسى جوق. قازىر سىناقتان ءوتۋ ءۇشىن تانىس ىزدەيدى. ءبىز ونىمەن كۇرەسۋىمىز كەرەك. ءبىر وبلىستا 3-4 اكىم بولادى. حالىق قالاۋلىسى بولۋعا لايىقتى ادامدار بار. ولار تەستتەن ءسۇرىنىپ، وزگە ادامداردىڭ كولەڭكەسىندە قالىپ قالا بەرەدى.
كەزىندە شاڭ جۋىتپاعان تەستىلەۋ جۇيەسىنىڭ بۇگىندە جۇيەسىز بولىپ تۇرعان جايى بار. ويتكەنى ا كورپۋسىنا وتكەن ازاماتتاردىڭ % 50 ى بۇگىندە جۇمىسسىز سەندەلىپ ءجۇر.
ءبىر سوزبەن ايتقاندا، شيكىلىك شاش ەتەكتەن. ءبىراق اگەنتتىككە كەلگەن جاڭا باسشىنىڭ ەكپىنى جامان ەمەس. بۇگىنگى زاڭ جوباسى ۇلكەن ءىستىڭ باسى عانا. قازاق بيلىگىن بيىكتەن كورگىسى كەلەتىن دەپۋتاتتار ماڭىزدى قۇجاتتى ءبىرىنشى وقىلىمدا ءبىراۋىزدان قابىلدادى.
اۆتورلارى: جادىرا مەدەتبەك، ەرجان قاناپيا ۇلى
24.kz
