اق جايىق اقىن قىزىن ارداقتاۋدا - فوتو
م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىندە وتكەن «قازاق پوەزياسىنداعى اقۇشتاپ باقتىگەرەيەۆا الەمى» اتتى رەسپۋبليكالىق عىلىمي-تاجىريبەلىك كونفەرەنسيادا فيلولوگيا عىلىمدارىنىڭ كانديداتى، اتالمىش ۋنيۆەرسيتەتتىڭ پروفەسسورى، «ماحامبەت» عىلىمي-زەرتتەۋ ورتالىعىنىڭ ديرەكتورى سەرىكقالي شاراباسوۆ، قازاق فيلولوگياسى كافەدراسىنىڭ مەڭگەرۋشىسى، دوتسەنت زەينوللا مۇتيەۆ، ۇلداي ەرجانوۆا اقىن شىعارماشىلىعىنىڭ سان قىرى جونىندە باياندامالار جاسادى.
اقىن، قازاقستان جازۋشىلار وداعى باسقارماسى ءتوراعاسىنىڭ ورىنباسارى، مەملەكەتتىك «دارىن» جاستار سىيلىعىنىڭ لاۋرەاتى جاناربەك ءاشىمجان، جازۋشى، قازاقستاننىڭ ەڭبەك سىڭىرگەن قىزمەتكەرى مەرەكە قۇلكەنوۆ جۇرەكجاردى لەبىزدەرىن ارناسا، اقىن عايساعالي سەيتاق «كۇي مەن ولەڭ» اتتى جىرىن وقىدى.
ۋنيۆەرسيتەت رەكتورى، اكادەميك اسحات يمانعاليەۆ اقۇشتاپ اقىنعا ريزاشىلىق ءبىلدىرىپ، قۇرمەت كورسەتتى.
كەشتە اقىن اقۇشتاپ باقتىگەرەيەۆا زال تولى وقىرماندارىنا رياسىز ىقىلاسىن كورسەتىپ، ومىردەگى ەڭ قىمبات رۋحاني دۇنيە - ءسوز بەن ادەبي مۇرانىڭ جوعالماۋى كەرەكتىگىن، وسكەلەڭ ۇرپاق تاربيەسىنىڭ مىقتى بولۋى قاجەتتىگىن اتاپ ءوتتى. اقىن ولەڭدەرى وقىلىپ، سوزدەرىنە جازىلعان اندەر ورىندالدى.
اقىن تويى بۇگىن وبلىستىق قازاق دراما تەاترىندا جالعاسىپ، وندا «جايىقتان ەستى سامال جىر» اتتى فوتوكورمە اشىلىپ، اقۇشتاپ باقتىگەرەيەۆانىڭ جاڭا ءۇش تومدىق جيناعىنىڭ تۇساۋى كەسىلەدى. سودان كەيىن ول «جايىقتان ۇشقان اققۋ-جىر» اتتى ادەبي-مادەني كەشكە ۇلاسادى.
اۆتور: ەلجان ەرالى
