بەس كۇن اداسقان قىزىلوردالىق جىگىت ءشوپ پەن سەكسەۋىل تۇقىمىن جەگەن

استانا. قازاقپارات - قىزىلوردا وبلىسىندا دالالىقتا بەس كۇن بويى اداسىپ كەتكەن ەر ادام اشتان ولمەۋ ءۇشىن شوپپەن جانە سەكسەۋىل تۇقىمىمەن قورەكتەنگەن، - دەپ حابارلايدى س ت ۆ تەلەارناسى.

پوليتسيا جەرگىلىكتى وباعا قارسى مەكەمەنىڭ جۇمىسشىسىن اداسىپ جۇرگەن جەرىنەن قۇتقاردى.

ول قارماقشى اۋدانىنداعى قۋانداريا اۋىلىنان قىزمەتتىك اۆتوكولىگىمەن قوسقۇدىق ستانسياسىنا شىققان.

ءبىراق دىتتەگەن جەرىنە جەتپەيدى. ءۇش تاۋلىكتەن سوڭ پوليتسياعا ءبىر ەر ادامنىڭ اداسىپ كەتكەنى تۋرالى حابار كەلىپ ءتۇستى. "ادامنىڭ جوعالىپ كەتكەنى تۋرالى اقپاراتتى العاننان كەيىن شۇعىل تۇردە جەتى ىزدەۋ توبى قۇرىلدى. ىزدەستىرۋ-قۇتقارۋ جۇمىستارىنا "قازاۋەقۇتقارۋ" اكسيونەرلىك قوعامىنىڭ م ي-8 تىكۇشاعى جۇمىلدىرىلدى. ءىز-ءتۇسسىز جوعالعان ادامنىڭ جۇرگەن باعىتى مۇقيات تەكسەرىلدى. ىزدەۋ جۇمىستارىنىڭ ەكىنشى كۇنى ەر ادام امان-ەسەن تابىلدى. قازىرگى ۋاقىتتا ول وتباسىمەن بىرگە"، - دەدى قىزىلوردا وبلىستىق ءى ءى د كريمينالدىق پوليتسيا باسقارماسىنىڭ ءبولىم جەتەكشىسى جالعاس ءجۇسىپوۆ.

ەر ادامنىڭ ايتۋىنا قاراعاندا، ول دالالىقتا امان قۇتقارىلاتىنىنا ۇمىتتەنبەگەن دە. جانارمايى مەن تەلەفونىنىڭ قۋاتى تاۋسىلعان. بەس كۇن ىشىندە ول ءشوپ پەن سەكسەۋىل تۇقىمىن جەگەن. اداسىپ ءجۇرىپ، شوپاندار قازعان قۇدىقتى تاۋىپ الىپتى.

ۇستىندەگى كيىمىن قاۋعا ورنىنا پايدالانىپ، قۇدىقتان سۋ الىپ ىشكەن. كۇشىن جوعالتىپ، كۇدەرىن ۇزە باستاعان كەزدە، سوڭعى جازبا قالدىرىپ تا ۇلگەرگەن. ماشيناسىنىڭ سىرتىنا "پاپا، ماما! سىزدەرمەن قوشتاسقىم كەلمەيدى!" دەپ جازىپتى. ەندى اداسقان جىگىت وتباسىمەن امان-ەسەن قاۋىشىپ وتىر.