ةۋروپانى ەكى رەت باعىندىرعان بوكسشى
قۇجاتتاردا تۋىپ وسكەن جەرى پاۆلودار دەپ كورسەتىلگەنىمەن، بوكسشىنىڭ بالالىق شاعى جامبىل قالاسىندا (قازىرگى تاراز) وتكەن. سەرىكتىڭ ەگىزى بار. قاتار تۋعان قوس بالاعا اكەسى سەرىك جانە ەرىك دەپ ات قويىپتى. «سەندەر ەگىزسىڭدەر، ومىردە ءبىر- بىرىڭە تىرەك بولىپ ءجۇرۋ ءۇشىن بوكسقا بارىڭدار»، - دەپتى اكەسى. سەرىكتىڭ العاشقى باپكەرى بىلىكتى بوكسشى كەڭەس وماروۆ ەدى. كەيىن كونستانتين تسحايدىڭ قولىندا جاتتىقتى. ول كەزدە كەڭەس وداعىنىڭ قۇراماسىنا كىرۋ وڭاي ەمەس ەدى. سەرىك قوناقبايەۆ جاستار اراسىندا وتكەن Ⅱبۇكىل وداقتىق ويىنداردا ءبىرىنشى ورىن الىپ، ك س ر و-نىڭ جاستار قۇراماسىنا قابىلداندى. ونىڭ دا وكىنىشتى ساتتەرى از ەمەس. ءبىر عانا ماسكەۋدەگى جەڭىلىسىمە ءوزىمىز كىنالىمىز دەيدى. باپكەرى تسحايدىڭ دا جاستىعى اسەر ەتكەن. دايىندىعىمىز ناشار بولدى جانە سالماقتى كوپ قۋدىم. فينالدا پاتريتسيو وليۆا دا مەن سەكىلدى شابۋىلداۋدى جاقسى كورەتىن بوكسشى. ايقاس قيىن ءوتتى. ول ماعان جابىسا بەردى دە، اينالعاندا كۇرەس بولىپ كەتتى. قىسقاسى، ول ماعان دۇرىستاپ ونەر كورسەتۋگە مۇمكىندىك بەرگەن جوق - دەپ ەسكە الدى سول كەزدى.
ودان بۇرىن بىرنەشە بوكسىشىنى قارا تەڭىزگە اپارىپ ەكى اپتا دەمالدىرىپتى. ەشقانداي جاتتىعۋ كورمەگەن جىگىتتەر بوساڭسىپ كەتكەن ەكەن. جاتتىعۋىنىڭ ءالسىز بولاتىنى وسىدان بولسا كەرەك. ءبىر قىزىعى سەرىك كەرىمبەك ۇلى سول فينالداعى قارسىلاسى وليۆامەن ءالى كۇنگە دەيىن ارالاسىپ تۇرادى ەكەن. پاتريتسيو يتاليانىڭ پالەرمو قالاسىندا زاڭ شىعارۋشى ورگاننىڭ دەپۋتاتى. ەكى قىز، ءبىر ۇلدىڭ اكەسى اتانعان بوكسشى 24 جاسىندا ۇلكەن سپورتپەن قوش ايتىستى. وسىلايشا ونىڭ ساياسي قىزمەتتەگى جولى باستالىپ كەتتى. سىمباتتى كەلگەن سپورتشىعى عاشىق بولماعان قىز كەمدە- كەم. كەڭەس وداعىنىڭ ءار قيىرىنان جىلىنا 5000 نان اسا حاتتار كەلىپ تۇسەتىن دەيدى بوكسشى. ءبىراق بىرەۋىنە دە جاۋاپ جازباپتى. ۋاقىتىم بولمادى، تەك ويلاعانىم بوكس بولدى. سوڭىنا دەيىن جەتسەم دەگەن ارماننىڭ جەتەگىندە كەتتىم دەيدى سەرىك كەرىمبەك ۇلى. شارشى الاڭدا وتكەن عۇمىرىندا ەكى مارتە ەۋروپا چەمپيونى، الەم كۋبوگىنىڭ يەگەرى جانە 1981 - جىلى الەمنىڭ ەڭ ۇزدىك بوكسشىسى دەگەن اتاققا يە بولدى. بوكسقا سىڭىرگەن ەڭبەگى ءۇشىن «دارىن» مەملەكەتتىك جاستار سىيلىعى مەن قازاق تۋريزم جانە سپورت اكادەمياسىنىڭ پروفەسسورى اتاندى. سەرىك قوناقبايەۆ اعامىزدىڭ ەسىمى قازاق بوكس تاريحىندا التىن ارىپپەن جازىلدى.
baq.kz
