قازاق دزيۋدوسىنىڭ قاس سۇلۋى
- كەشىرىڭىز، ەڭ اۋەلى شىن اتىڭىزدى ءبىلىپ الساق. دۇرىسى - ءماريام با، الدە ماريان با؟
- ءماريام. ءبىراق ءاۋ باستا ءتولقۇجاتىما قاتە جازىلىپتى. ونى ءوزىم دە كەيىننەن ءبىلدىم. ماريان بولىپ جازىلىپ كەتىپتى. سوندىقتان رەسمي قۇجاتتارعا ماريان بولىپ جازىلىپ ءجۇر. جاپپاي شاتىسۋدىڭ توركىنى وسىدان. نەگىزى، ازان شاقىرىپ قويعان اتىم - ءماريام.
- اكەڭىزدىڭ قازاق ەكەنىن بىلەمىز. بىرەۋلەر اناڭىز قىرعىز دەيدى. ءبىراق ءتۇرىڭىز وعان ۇقسامايدى...
- اكەم - قازاق، انام - ورىس. ءبىراق اكەم ىستىقكولگە بارىپ، سول جەردى ۇناتىپ قالىپ، انامدى سول جاققا جەتەلەپ اپارىپتى. ال مەن سول ىستىقكول بويىندا تۋىپ قالىپپىن. سودان شىعار، انامدى قىرعىز دەۋشىلەردىڭ بار ەكەندىگى. (كۇلىپ).
- مۇمكىن ادەمى بولۋىڭىز دا تابيعات اياسىندا دۇنيەگە كەلگەندىكتەن شىعار. جالپى، سۇلۋلىق تابيعاتىڭىزدان با، الدە تاتاميدەگى توككەن تەرلەرىڭىزدىڭ جەمىسى مە؟
- ءبىرىنشى كەزەكتە ومىرگە وسىنداي قىلىپ اكەلگەن اتا-اناما راحمەت. ءبىراق تاتاميدىڭ دە، ياعني سپورتتىڭ دا پايداسى كوپ بولدى. تارتىلا ءتۇستىم. نەگىزى، تابيعاتتىڭ بەرگەن سىيى عوي. ەكەۋىنىڭ بىرىگۋى دەپ سانايمىن. اكەم سپورتتى جاقسى كورەدى. جاس كەزىمدە مەنى ءبىرتالاي سپورتتىڭ تۇرىنە اپاردى. كاراتە، گيمناستيكا، ءجۇزۋ سپورتتارىمەن دە اينالىستىم. ۇناعانى دزيۋدو بولدى.
- قازىر ءسىزدى قازاق تاتاميىنىڭ قاس سۇلۋى دەۋشىلەر كوپ، بۇل سىزگە ەشقانداي دا كەدەرگى كەلتىرمەي مە؟
- جوق.
- عاشىق بولۋشىلار، سۇيسىنۋشىلەر كوپ شىعار؟ ولار جالىقتىرماي ما؟
- مەزى قىلادى دەي المايمىن. ءبىراق كەيدە... الەۋمەتتىك جەلىدە دوستىق جىبەرەتىندەر تىم كوپ. ايتسە دە، جامان ەمەس، بۇل دا ۇنامدى قۇبىلىس قوي.
- بالكىم، توپ-مودەل بولعىڭىز كەلەتىن شىعار؟
- وليمپيادا ويىندارىنا دەيىن تەك قانا - تاتامي! ودان كەيىن ءسان سالاسىن دا ويلاۋعا بولادى.
- فوتوسەسسيانى ۇناتاسىز با؟
- ءيا، ماعان ۇنايدى.
- حوببيىڭىز نە؟
- جاڭا بەلەستەردى باعىندىرۋ ۇنايدى. تاۋدى جاقسى كورەمىن. كينوعا بارعاندى ۇناتامىن. گيمناستيكانى ۇناتامىن، اينالىسقانمىن. بۇرىن ازداپ سۋرەت سالعانمىن. ءبيدى جاقسى كورەمىن. تابيعات اياسىن جاقسى كورەمىن. بالىق اۋلاۋعا دا شىعاتىنىم بار. جالپى، ءومىردىڭ قىزىعىنىڭ ءبارىن جاقسى كورەمىن.
- جىگىتىڭىز بار ما؟
- بار. ول مەنى تۇسىنەدى. «اۋەلى دزيۋدودا ءوز ماقساتىڭا جەتىپ ال»، دەپ قولداپ وتىرادى.
- ەندى دزيۋدوعا كەلسەك، ازيا ويىندارىنداعى ناتيجەڭىزگە ريزاسىز با؟
- ءيا، ازيا ويىندارىنداعى ونەرىمە ريزامىن. ارينە، بۇدان دا باعالى جۇلدەنى ارماندادىم. ءبىراق قولا دا جامان ەمەس.
- بۇل قولا ءسىزدى الداعى جەڭىستەرگە ىنتالاندىرىپ، اسقاق ارماندارىڭىزعا جەتەلەيتىن شىعار؟
- ارينە. بۇل قولا ۇلكەن جەڭىستەرىمنىڭ الدى دەپ بىلەمىن. كىشىگىرىم رەپەتيتسيا دەسەم دە بولادى. نەگىزى، قانداي جۇلدە بولسىن، وڭايشىلىقپەن كەلمەيدى عوي. ءارى بۇل جۇلدە وسالداۋ تۇستارىمدى دا ايقىنداپ بەردى.
- تاتاميدە ەسەڭىز كەتىپ جۇرگەن قارسىلاستارىڭىز بار ما؟
- ازىرشە بار، ازىرشە عانا...
- اۋىرتۋ تاسىلدەرىن قولدانعاندى جاقسى كورەتىن سياقتىسىز؟
- ءيا، مەن اۋىرتۋ تاسىلدەرىن جاقسى كورەمىن. ازيا ويىندارىندا عانا ەمەس، بۇعان دەيىن دە ۇتىلىپ جاتىپ، سوڭعى سەكۋندتاردا اۋىرتۋ تاسىلىمەن جەڭىسكە جەتكەن بەلدەسۋلەرىم بولدى.
- جاقسى، ءماريام. قازاق حالقىنىڭ ماقتانىشى بولىپ، العا قويعان ماقساتتارىڭا جەتە بەر.
- راحمەت.
اۆتور: نۇرعازى ساسايەۆ
«الاش ايناسى»
