شاكارىم تۋرالى عۇمىرباياندىق كىتاپ تۇرىك تىلىندە جارىق كوردى

استانا. قازاقپارات - تۇركيا استاناسىندا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى، ق ر ۇ ع ا كوررەسپوندەنت- مۇشەسى، تاريح عىلىمدارىنىڭ دوكتورى، حالىقارالىق «ماڭگى ەل» عىلىمي- كوپشىلىك تاريحي جۋرنالىنىڭ باس رەداكتورى ەرلان سىدىقوۆتىڭ «شاكارىم» اتتى تانىمدىق-عۇمىرباياندىق كىتابى تۇرىك تىلىندە جارىق كوردى.

قازاقستان عالىمىنىڭ ەڭبەگى انكارا قالاسىنداعى اتاقتى Bengu باسپاسىنان جارىق كوردى. الەمدىك رۋحانيات تاريحىندا ورنى بار قازاق تۇلعاسى تۋرالى تۇركى تىلىندەگى تۇڭعىش تولىمدى ەڭبەكتى ءتىل مامانى، PhD ءلاززات وراقوۆا اۋدارعان. ال باسپادان شىعارۋعا تۇركى كەڭەسى ءتوراعاسىنىڭ بۇرىنعى ورىنباسارى، قازىرگى تۇركى اكادەمياسىنىڭ پرەزيدەنتى دارحان قىدىرالى ەڭبەك ءسىڭىردى.

«مەن بۇل جاڭالىقتى ەستىپ قاتتى قۋانىپ تۇرمىن. ابايدى، شاكارىمدى، ماعجاندى اقىن دەۋ از، بۇلار - تۇركى دۇنيەسى مادەنيەتىنىڭ التىن كوپىرلەرى. يۋنۋس ەمرە مەن شاكارىم قۇدايبەردى ۇلى پوەزياسىندا ورتاق سارىندار وتە كوپ. مەن شاكارىمدى قازاقشا وقىدىم. ويى تەرەڭ، حالىق تاعدىرىنا ەرەكشە قام جەگەن بۇل اقىندى تۇركيا بىلسە عوي دەپ جۇرەتىنمىن. قۇرمەتتى رەكتور ەرلان سىدىقوۆ كىتابىنىڭ تۇرىكشە اۋدارماسىن شىن ىقىلاسپەن قابىلدادىم. تۇرىك-قازاق مادەني بايلانىستارى بۇدان ءارى دە ارتا بەرەتىنىنە سەنىمدىمىن، - دەيدى يۋنۋس ەمرە اتىنداعى تۇرىك مادەنيەت ورتالىعىنىڭ ديرەكتورى يبراھيم يىلدىرىم.

«بۇل كىتاپتا شاكارىمنىڭ قازاق مادەنيەتى مەن ادەبيەتىنە جانە ساناسىنا قوسقان ۇلەسىن ەرلان سىدىقوۆ مىرزا جاڭادان قاراستىرادى. وقىرماندارعا وسى كىتاپتى وقۋعا كەڭەس بەرەمىن»، - دەيدى ەۋرازيا جازۋشىلار وداعىنىڭ ءتوراعاسى جاقىپ ومەر ۇلى.

كىتاپتىڭ العاشقى وقىرماندارى اقىن، ءدىن تانۋشى، شەجىرەشى، ويشىل شاكارىم قۇدايبەردى ۇلى تۋرالى بۇل عۇمىرباياندىق كىتاپتىڭ تۇرىك وقىرماندارىنا جەتۋى مەن تانىلۋى - قازاقستان ادەبيەتى مەن مادەنيەتى ءۇشىن ۇلكەن ولجا دەگەن باعا بەردى. ولاردىڭ ايتۋىنشا، قازاقتىڭ ۇلى قايراتكەرلەرىن الەمگە كەڭىنەن تانىتۋ - ۇلكەن دارەجە.

zTengrinews.k