قازاقستان مەن تۇركيا جاسوسپىرىمدەر اراسىنداعى سۋيتسيد كورسەتكىشىنەن كوش باستاپ تۇر

استانا. قازاقپارات - قازاقستان مەن تۇركيا جاسوسپىرىمدەر اراسىنداعى سۋيتسيد كورسەتكىشى بويىنشا كوش باستاپ تۇر. بۇل تۋرالى بۇگىن ءماجىلىستىڭ الەۋمەتتىك-مادەني دامۋ كوميتەتىنىڭ كەڭەيتىلگەن وتىرىسىندا «جاستار» عىلىمي- زەرتتەۋ ورتالىعىنىڭ ديرەكتورى جانار بۋكانوۆا ءمالىم ەتتى.

ورتالىق باسشىسىنىڭ ايتۋىنشا، ءوز-وزىنە قول جۇمساۋ سالدارىنان بولاتىن «ءومىر جاسىنىڭ جوعالتۋ ىقتيمالدىعى» الەمدىك كورسەتكىشىنەن دە قازاقستان جوعارى ورىندا تۇر.

«جالپى، مەملەكەتتەر اراسىندا جاھاندىق زەرتتەۋ بويىنشا مەرزىمىنەن بۇرىن قايتىس بولۋ نە بولماسا «ءومىر جاسىنىڭ جوعالتۋ ىقتيمالدىعى» اتالاتىن ينديكاتورلاردى ەسەپكە الۋ بارىسىنداعى كورسەتكىشتەر دە الاڭداتپاي قويمايدى. شەتەل ساراپشىلارىنىڭ ايتۋىنا قاراعاندا، قازاقستان بۇگىنگى تاڭدا ءوز-وزىنە قول جۇمساۋ سالدارىنان «ءومىر جاسىن جوعالتۋ ىقتيمالدىعى» جاعىنان الەمدە ەڭ جوعارى كورسەتكىشتى يەلەنىپ وتىر. وكىنىشكە قاراي، 15-19 جاستار ارالىعىنداعى «ءومىر جاسىنىڭ جوعالتۋ ىقتيمالدىعى» توبىنا جاتاتىنداردىڭ جالپى سانىنىڭ 12,2 پايىزىنا دەيىن ءوز-وزىنە قول جۇمساۋلار قۇرايدى»، - دەيدى ج. بۋكانوۆا.

ونىڭ ايتۋىنشا، قازاقستاندا جۇرەكتىڭ يشەميالىق اۋرۋىنان «ءومىر جاسىن جوعالتۋ» دەڭگەيى 11,2 پايىزدى قۇراسا، جول اپاتتارىنان الىنعان جاراقاتتاردان - 8,5 پايىزدى، ينسۋلت - 4,4 پايىزدى قۇرايدى.

اۆتور: قانات مامەتقازى ۇلى