قازاقستان مەن قىتايدىڭ اسكەري سالاداعى ىنتىماقتاستىعى نىعايا تۇسپەك

استانا. قازاقپارات - بۇگىن قازاقستان رەسپۋبليكاسىنىڭ قورعانىس ءمينيسترى سەرىك احمەتوۆ قىتاي حالىق رەسپۋبليكاسىنا رەسمي ساپارى شەڭبەرىندە ق ح ر مەملەكەتتىك كەڭەسىنىڭ پرەمەرى لي كەتسيانمەن كەزدەستى، دەپ حابارلايدى ۆەدومستۆونىڭ باسپا ءسوز قىزمەتىنەن.

كەزدەسۋدە ەكىجاقتى ستراتەگيالىق ىنتىماقتاستىقتى، سونىڭ ىشىندە اسكەري جانە اسكەري-تەحنيكالىق سالاداعى ءوزارا ءىس-قيمىلدى ءارى قاراي نىعايتۋ ماسەلەلەرى تالقىلاندى.

«قازاقستان مەن قىتايدى ەكى ەل كوشباسشىلارىنىڭ جىلى جانە دوستىق قارىم-قاتىناسىنا نەگىزدەلگەن بەرىك جانە ۇزاق مەرزىمدى ىنتىماقتاستىق بايلانىستىرادى. ەكى ەل قورعانىس ۆەدومستۆولارى اراسىنداعى ارىپتەستىك وسى ىنتىماقتاستىقتىڭ ماڭىزدى ءبىر باعىتى بولىپ تابىلادى»، - دەدى ق ر قورعانىس ءمينيسترى.

ءوز كەزەگىندە ق ح ر مەملەكەتتىك كەڭەسىنىڭ پرەمەرى لي كەتسيان قىتايدىڭ قازاقستانمەن مەملەكەتارالىق بايلانىستاردىڭ بارلىق باعىتتارى بويىنشا، سونىڭ ىشىندە اسكەري جانە اسكەري-تەحنيكالىق سالادا دا ستراتەگيالىق ءوزارا ءىس-قيمىلدى كەڭەيتۋگە ازىرلىگىن اتاپ ءوتتى.