قازاقستاندا تۇڭعىش رەت قازاق كۇرەسىنەن «الەم بارىسى» حالىقارالىق تۋرنيرى وتەدى

استانا. قازاقپارات - وتكەن جىلى تۇڭعىش رەت قازاق كۇرەسىنەن «ەۋرازيا بارىسى» وتكەن بولاتىن. ال بيىل تاعى ءبىر ۇلكەن جاڭالىقتىڭ كۋاسى بولماقپىز - ءتول كۇرەسىمىزدەن «الەم بارىسى» جارىسى وتپەك.

«الەم بارىسى» قازاننىڭ 25 كۇنى پاۆلودار قالاسىندا، ال ەكىنشى رەت «ەۋرازيا بارىسى» حالىقارالىق ءتۋرنيرىنىڭ جالاۋى قاراشانىڭ 22 كۇنى تاراز قالاسىندا جەلبىرەمەك. بۇل تۋرالى «قازاقستان بارىسى» قازاق كۇرەسىن دامىتۋ قورى حابارلادى.

وسىعان وراي ەرتەڭ، ياعني قىركۇيەكتىڭ 24 كۇنى ساعات 11:00-دە «Rixos President Astana» قوناق ءۇيىنىڭ «Orda» كونفەرەنسيا زالىندا «قازاقستان بارىسى» قازاق كۇرەسىن دامىتۋ قورىنىڭ ۇيىمداستىرۋىمەن اتالمىش تۋرنيرلەرگە ارنالعان باسپا ءسوز ءماسليحاتى وتكىزىلەدى.

وعان قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى، «سامۇرىق-قازىنا» ۇلتتىق ءال-اۋقات قورى» ا ق باس ديرەكتورى دارحان قالەتايەۆ، قازاقستان رەسپۋبليكاسى قازاق كۇرەسى فەدەراتسياسىنىڭ پرەزيدەنتى ارمان شورايەۆ، پاۆلودار وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى مارات ايداشيەۆ، جامبىل وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى گاملەت قايناربەكوۆ قاتىسادى.

ەلىمىزدە قازاق كۇرەسىنەن تۇڭعىش رەت وتكىزىلگەلى وتىرعان «الەم بارىسى» حالىقارالىق تۋرنيرىندە الەمنىڭ 30 دان استام ەلدەرىنىڭ تۇيە پالۋاندارى كۇش سىناسادى. سونىمەن قاتار قازاقستاننىڭ قۇراما كومانداسى شەتەلدەردىڭ كوماندالارىمەن قازاق كۇرەسىنەنII « ەۋرازيا بارىسى» حالىقارالىق تۋرنيرىندە كەزدەسەدى.

جوبانىڭ ۇيىمداستىرۋشىلارى - «قازاقستان بارىسى» قازاق كۇرەسىن دامىتۋ قورى، قازاقستان رەسپۋبليكاسى قازاق كۇرەسى فەدەراتسياسى، سونداي-اق پاۆلودار وبلىسىنىڭ اكىمدىگى مەن جامبىل وبلىسىنىڭ اكىمدىگى.

باس دەمەۋشىسى - «سامۇرىق-قازىنا» ۇلتتىق ءال-اۋقات قورى» ا ق. ال دەمەۋشىلەرى جانە سەرىكتەستەرى «پرومماشكومپلەكت» ج ش س، «قازاگرو» ا ق، «قازاقستان» جانە «ك ت ك» تەلەارنالارى، جوبا يدەياسىنىڭ اۆتورى ارمان شورايەۆ.

كۇنسۇلتان وتارباي