استانادا قىتايدىڭ قازاقستانداعى مادەنيەت كۇندەرى وتەدى
بۇل تۋرالى «قازاق اۋەندەرى» ا ق-نىڭ باسپا ءسوز حاتشىسى يسمايل ادىلەت حابارلادى.
مادەنيەت كۇندەرى اياسىندا 25 - قىركۇيەكتە ساعات 16.00 دە ۇلتتىق مۇراجايدا قىتاي فارفورى كورمەسى جانە قىتايدىڭ ەكولوگيالىق مادەنيەتى تاقىرىبىنداعى فوتوكورمە ۇيىمداستىرىلادى. كورمەلەردە قىتايدىڭ ەكسكليۋزيۆتىك، زاماناۋي، قولدان جاسالعان فارفور بۇيىمدارى، كەراميكا قولونەرى جانە قىتايدىڭ ەكومادەنيەتى مەن ەكواۋىلدار قۇرىلىسىنىڭ تابىسىن بەينەلەيتىن فوتوكارتينالار كورسەتىلمەك. كورمەلەر 14 - قازانعا دەيىن جۇمىس ىستەيدى.
سونداي-اق 25 - قىركۇيەكتە ساعات 19.00 دە «استانا وپەرا» مەملەكەتتىك وپەرا جانە بالەت تەاترىنىڭ ساحناسىندا، 28 - قىركۇيەكتە ساعات 19.00 دە اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا قىتاي حالىق رەسپۋبليكاسى ونەر شەبەرلەرىنىڭ كونسەرتتەرى وتەدى.
كونسەرتتەردە ق ح ر ورتالىق حالىقتىق ءان مەن ءبي ءانسامبلى، حۋاتسزين درامالىق ءبي ترۋپپاسى، تايۋان قالاسىنىڭ سيرك ونەرىنىڭ ترۋپپاسى، «ۆۋ سەفەن» وركەسترى مەن قىتايدىڭ تانىمال ارتىستەرى - ۆۋ نا، دۋن فەي، گوۋ چانچان، چەن چەن، مۋ مينسزيان، مۇرالاي بەيمۇرات جانە ت. ب. ونەر كورسەتەدى. كونسەرتتىك باعدارلاماعا قىتاي حالقىنىڭ اندەرى مەن ءبيى، مۋزىكاسى جانە سيركتىك ونەرى ەنگىزىلگەن.
