ارقانىڭ كەربەز سۇلۋ كوكشەتاۋى - فوتو

كوكشەتاۋ. قازاقپارات - «ارقانىڭ كەربەز سۇلۋ كوكشەتاۋى، دامىلسىز سۇلۋ بەتىن جۋعان جاۋىن. جان-جاقتان ەرتەلى كەش بۇلتتار كەلىپ، جۇرەدى ءبىلىپ كەتىپ ەسەن-ساۋىن...»، دەپ اقىن ساكەن جىرلاعانداي بۇگىنگى كۇنى اقمولا وبلىسىنىڭ ورتالىعى اۋقىمدى جاڭارتۋ جۇمىستارىنىڭ ناتيجەسىندە جاسانىپ، جارقىراپ تۇر دەۋگە بولادى.

اسىرەسە، م. گوركي كوشەسىنىڭ قوپا كولىمەن ۇشتاساتىن تۇسى تۇرعىنداردىڭ كوپ باراتىن سۇيىكتى جەرىنە اينالعان. مۇندا اپتانىڭ قاي كۇنىن الساڭ دا حالىقتىڭ قاراسى كوپ، ءبىرى اسەم تابيعات اياسىندا سەرۋەندەۋگە كەلسە، ەندى ءبىرى ەستەلىك سۋرەتكە ءتۇسىپ الەك.

وسى ورايدا، «قازاقپارات» ح ا ا-نىڭ وڭىردەگى ءتىلشىسى كوكشەتاۋدىڭ اسەم جەرلەرىنەن فوتورەپورتاج ۇسىنادى.

بيىل اقمولالىقتار بۇكىل ەل بولىپ، كوكشەتاۋ قالاسىنىڭ 190 جىلدىعىن دۇرىلدەتىپ اتاپ وتكەن بولاتىن. وسىعان وراي جاڭا ساۋلەت ەسكەرتكىشتەرى مەن اسەم نىساندار بوي كوتەرىپ، قالا جايناپ شىعا كەلدى.

 ەلباسى ءوزى تۇساۋ كەسكەن جاڭا دوستىق ءۇيىنىڭ اينالاسى اباتتاندىرىلا ءتۇسىپ، اسەم شىرشالار مەن قايىڭدار ەگىلدى، بەدەرتاس توسەلىپ، دەم الاتىن ورىندىقتار قويىلدى. بۇعان قوسا، وسى اراداعى توعاننىڭ جيەكتەرى تابيعي تاستارمەن كومكەرىلىپ، بۇرىنعى قامىس پەن بالدىر وسكەن سۋلار تازارتىلدى.

ءسويتىپ، وندا ايدىن بەتىندە اسەم سۋبۇرقاعى بىرنەشە مەتر بيىككە كوتەرىلىپ، ىستىق كۇندەرى جاعالاۋدا تۇرعان ادامداردىڭ جان سارايى، بەت-ءجۇزىن سالقىن لەپپەن سەرگىتىپ تۇراتىن ايشىقتى سۋبۇرقاق ورناتىلدى. وعان جاقىن، قولايلى ءبىر تۇسقا ۇلتتىق ناقىشتا دەم الۋشىلاردى كۇن كوزىنەن قالقالايتىن ورىن جاسالىپ، كەلگەن ادامدار اينالاداعى اسەم كورىنىسكە وسى ارادان ءسۇيسىنىپ وتىراتىن بولدى. ونىڭ جانىندا اناداي جەردە قۇستار ءمۇيىسى ورىن تەۋىپ، كوپشىلىك تابيعات اياسىندا تاپ ءبىر سولارمەن قاۋىشقانداي اسەرگە بولەنۋىن ايتساڭىزشى.

تەننيسكوشە جيەگىندەگى ادەمى ىدىستارعا وسىرىلگەن سان الۋان گۇلدەر دە كوڭىل حوشىن كەلتىرىپ، وسى ءبىر تۇستى جايناتىپ جىبەرگەنى ءتىپتى كەرەمەت. تاپ وسى اراداعى جاڭادان سالىنعان قان ورتالىعى، اتاۋى مەملەكەتتىك تىلدە جازىلىپ قويىلعان تەننيس ورتالىعى عيماراتتارى، باسقا دا ءتۇرلى-ءتۇستى رەڭمەن كوز جاۋىن الاتىن ەڭسەلى كوپ قاباتتى ۇيلەر، جاياۋ جۇرگىنشىلەر ءۇشىن بەدەرتاسى مەن اسفالتى جارقىراعان كوشەنىڭ ءوزىنىڭ مۇنتازداي تازالىعى قيال قۇسىن اسپانعا شارىقتاتقانداي.

سودان بولار، دەمالىس كۇندەرىن بىلاي قويىپ، جاي كۇندەردىڭ وزىندە وسى جەردەن كىسى قاراسى ۇزىلمەۋگە اينالدى. كوكشەتاۋلىقتار مەن قالا مەيماندارى كوپتەپ كەلىپ، جاعالاي لاعىل مونشاقتارىن شاشقان سۋبۇرقاقتى تاماشالايدى، سۋدان سوققان مايدا سامالعا ەركىن تىنىستاپ، دەم الادى. ولاردىڭ وزدەرىن الىسقا بارماي-اق، تاپ ءبىر تابيعاتتىڭ سۇلۋ اياسىندا جۇرگەندەي سەزىنەرلەرى انىق. قالادا وتاۋ قۇرىپ جاتقان جاس جۇبايلار دا تويلارىنىڭ الدىندا وسىلاي قاراي اسىعىپ، اسەم كورىنىستەردىڭ قۇشاعىندا ەستەلىك سۋرەتكە ءتۇسىپ الۋعا قۇمار.

بالاباقشالار تاربيەشىلەرى دە جاس بۇلدىرشىندەردى وسىندا اكەلىپ، اسەمدىك سىرىنا كوزدەرىن ۇيرەتە تۇسكەندەرىنە قۋاناسىڭ. جاستارى كەلگەن ارداگەرلەر، ءسابيىن جەتەكتەگەن اتا-انالار، ءبارى-ءبارى دە از ۋاقىتتا وسى ارانى وزدەرىنىڭ سۇيىكتى دەمالىس ورنىنا اينالدىرعان.

كورىكتى قالامىزدا حالىقتىڭ كوڭىلىنەن شىققان وسىنداي ورىندار ودان سايىن كوبەيىپ، ەل يگىلىگىنە قىزمەت ەتە بەرسە قانداي جاقسى.

ا







ۆتور:
 اسلان وسپانوۆ