بيىلعى توي ماۋسىمىندا جۇرتتىڭ ءبارىن بيلەتكەن انگە ارقاۋ بولعان ماريا ماگدالەنا دەگەن كىم؟

استانا. قازاقپارات - وسىدان ءبىراز ۋاقىت بۇرىن قازىرگى قازاق تويلارىنداعى توپ اندەردەردىڭ وندىعىن جاريالاعان بولاتىنبىز.

وسى وندىقتىڭ كوش باسىندا اسحات تارعىنوۆ ورىندايتىن «ماريا ماگدالەنا» ءانى تۇرعانىن تويشىل قاۋىم جاقسى بىلەدى.

ءتىپتى تويعا بارمايتىندار دا «ماريا ماگدالەنانىڭ» حيت ەكەنىنەن حاباردار.

ويتكەنى بيىلعى توي ماۋسىمىندا «ماريا ماگدالەنا» انىنىنە «قۇلاعىمىزدىڭ قۇرىشى قانعانى» سونشالىق، ەكىنىڭ ءبىرى وسى ءاندى ىڭىلداپ ايتىپ جۇرەدى.

«الاش ايناسى» جۇرتتىڭ ءبارىن بيلەتكەن انگە ارقاۋ بولعان ماريا ماگدالەنانىڭ كىم ەكەنىن انىقتاۋعا تىرىسىپ كوردى.

شىركەۋ تاريحىنا قاتىستى دەرەكتەردى اشىپ قالساڭىز، مىندەتتى تۇردە ماريا ماگدالينانىڭ اتى اتالادى. جالپى سوڭعى ون جىلدىقتا الەمدەگى جازۋشىلار تاراپىنان دا ماريا ماگداليناعا دەگەن قىزىعۋشىلىق ارتا تۇسكەن.

كەيىنگى كەزدە وسى ءبىر جۇمباق بەينە تۋرالى ءبىرشاما شىعارمالار جارىق كورگەن ەكەن. اسىرەسە اتاقتى كود دا ۆينچيدەن كەيىن ماريا ماگدالەنا يسۋستىڭ قۇپيا ايەلى، بالاسىنىڭ اناسى رەتىندە الەم جۇرتىشىلىعىن قىزىقتىرا ءتۇستى. زاماناۋي جازۋشىلاردىڭ ءبىرى ماريا ماگدالينانى «ەۆانگەليا قۇدايى» دەسە ەندى بىرەۋى «يسۋستىڭ ايەلى»، تاعى ءبىرى حريستيان ءدىنىنىڭ نەگىزىن قالاۋشى ايەل دەپ ونى اپوستولعا تەڭەيدى.

ىنجىلدە يسۋس حريستوستىڭ اناسىنان كەيىن ماريا ماگدالەانىڭ اتى ءجيى كەزدەسەدى ەكەن. كەيبىر دەرەكتەرگە قاراعاندا يسۋس حريستوس جەڭىل ءجۇرىستى ايەلدىڭ بويىنان جەتى شايتاندى قۋىپ، ونى تازارتقان، سودان كەيىن ماريا يسۋستىڭ قاسىنان ءبىر ەلى قالماي، ونىڭ ايتقاندارىن بۇلجىتپاي ورىندايتىن سۇيىكتى ايەلىنە اينالعان دەسەدى. ءبىرىنشى عاسىردا ايەلدەرگە ماريا دەگەن ەسىم ءجيى قويىلعان. سوندىقتان ماريا ماگدالەنا سول زامانداعى كوپ ايەلدەردىڭ جيىنتىق وبرازى بولۋى مۇمكىن دەگەن دە بولجامدار بار.

پروۆاسلاۆتىق حريستيانداردىڭ تۇسىنىگى بويىنشا ول حريستوستىڭ ولىمىنە، قايتا تىرىلۋىنە كۋا بولعان ايەل، ونىڭ ومىرلىك سەنىمدى سەرىگى دەپ كورسەتىلەدى. ال كاتوليكتىك حريستياندار ماريا ماگدالينانى جەزوكشە، ەركەكتەردى ازعىرۋشى، تۋرا جولدان تايدىرۋشى، ۇرى رەتىندە سۋرەتتەيدى. ءبىراق ىنجىلدەگى دەرەكتەر وتە از جانە قاراما-قايشىلىقتارى كوپ بولعاندىقتان ماريا ماگدالينانىڭ كىم بولعانى ءالى كۇنگە جۇمباق.

ماريا ماگدالينا ميگدال-ەل دەگەن قالانىڭ تۇرعىنى دەگەن ماعىنانى بىلدىرەدى دەگەن دە دەرەكتەر بار. ال تالمۋد ماتىندەرىندە ميريەم -  بۇيرا شاشتى دەگەن ماعىنا بەرسە، ەجەلگى يۆريت تىلىندە ماگدالينا -  كۇناھار دەپ اۋدارىلادى ەكەن. باتىس جازبالارىندا ماريا ماگدالينانىڭ يسۋستىڭ اياعىن ءوزىنىڭ شاشتارىمەن سۇرتكەنى تۋرالى جازىلعان.

 

ايتا بەرسەك، ماريا ماگدالينا تۋرالى اڭىز كوپ. بۇگىندە ول تۋرالى تالاي كىتاپ جارىق كوردى، فيلمدەر ءتۇسىرىلدى، اندەر دە جازىلعان. مىسالى، رەسەيدىڭ بەلگىلى ءانشىسى فيليپ كيركوروۆتىڭ ورىنداۋىنداعى «ماريا ماگدالەنا» ءانى ەركەكتەردى ەسىنەن تاندىرۋشى ايەلدەرگە ارنالعان.

ماريا ماگدالەنانى فيليپپ كيركوروۆ قالاي شىرقايمىن دەسە دە، قانداي كليپ تۇسىرەمىن دەسە دە جاراسادى. ءبىزدىڭ قازاق انشىلەرى دە كيركوروۆتان قالىسپاي ماريا ماگدالەنانى انگە قوسىپ شىرقاپ ءجۇر...