مادەنيەت ءمينيسترىنىڭ اشى سىنى حالىق ارتىسىنە جاقپاي قالدى

استانا. قازاقپارات - ماجىلىسكە كەلگەن ءمينيستردىڭ رەفورماسىن دەپۋتاتتار قولداعانىمەن تىڭ باستاما ارىستانبەك مۇحامەدي ۇلىنىڭ ونەردەگى ارىپتەستەرىنە جاقپاي قالعان سەكىلدى.

تومەنگى پالاتاعا ءمينيستردىڭ ەسەبىن تىڭداۋعا شاقىرتىلعان تۇڭعىشباي جامانقۇلوۆ، باستى ءرولدى تەاتر باسشىلارىنىڭ ايەلى سومداعاندا تۇرعان ەشتەڭە جوق دەپ وتىر.

"امبيتسياسى ۇلكەن ادام بولسا، ارينە ول ءوزىنىڭ جازعانىن قويادى، ءوزى قويادى جانە ءوز ايەلى بولماسا، جاقسى كورەتىن بىرەۋى ءرولدى وينايدى. بۇل سۋبەكتيۆتى ماسەلە. بۇل ۇلكەن پروبلەما ەمەس"، - دەگەن پىكىردە حالىق ءارتىسى.

بۇعان دەيىن حابارلاعانىمىزداي، مادەنيەت ءمينيسترى ايەلدەرىنە باستى ءرولدى بەرەتىن تەاتر ديرەكتورلارىنا شۇيلىككەن بولاتىن. ول سۇيىكتى جارلارىن عانا جۇلدىز قىلۋدى ويلايتىن باسشىلاردىڭ قۋلىعى بىتپەيدى دەيدى. ءتىپتى وزدەرى جازعان قويىلىمداردى ساحنالاۋعا ادەتتەنىپ العان.

ونەردەگى ارىپتەستەرىنىڭ شەكتەن شىققان قىلىعىن ماجىلىستە ارىستانبەك مۇحامەدي ۇلى جاسىرماي جايىپ سالدى دەپ حابارلايدى ktk ارناسى.

"ديرەكتور بولعان سوڭ تەاتر باسشىلارى ءوز پەساسىن ساتىپ الادى. سودان كەيىن اقشا تابۋ ءۇشىن ءوزى رەجيسسەر بولادى. باستى رولدە سۇيىكتى جارى جانە ءوزى دە وينايدى. ونى ءبارىمىز ناقتى بىلەمىز. ايەلى مەن ءوزىنىڭ عانا اتىن شىعارۋدى ويلايتىن تەاتر ديرەكتورلارىنا ەندى تىقىر تاياندى"، - دەگەن ەدى ۆەدومستۆو باسشىسى.

سەبەبى مادەنيەت مينيسترلىگى تەاتر رەپەرتۋارلارىن قاتاڭ باقىلاۋعا الماقشى. ول ءۇشىن ارنايى باسقارما قۇرىلىپ جاتىر. سونداي-اق، تەاترلاردا كوركەمدىك جەتەكشى دەگەن قىزمەت قايتا جاندانباق.

ول سپەكتاكلدىڭ ساپاسىنا جاۋاپ بەرىپ، قويىلىمعا ارتىستەردى ىرىكتەپ كىمنىڭ باستى ءرولدى سومدايتىنىن تاڭدايدى.

ال ماجىلىسمەن گۇلنار سەيتماعانبەتوۆا كەرىسىنشە، ءمينيستردىڭ ءوزىن سىباپ تاستادى:

"مادەنيەت ءمينيسترىنىڭ ەلىمىزدەگى قازاقتىڭ ۇلتتىق تەاترلارىنىڭ، قازاق دراما تەاترلارىنا دەگەن كوزقاراسىنىڭ، پوزيتسياسىنىڭ جوقتىعى ءبىزدى قىنجىلتادى"، - دەدى ول.

بۇعان مادەنيەت جانە سپورت ءمينيسترى "مەن ءوز سوزىمدە بۇل سۇراقتارعا نۇكتە قويدىم. بارلىعى كەلەدى دە ءبارى جاقسى بولادى، بارلىعىن ىستەيمىز دەپ كەتىپ قالعانى ول وتە دۇرىس ەمەس. دەپۋتاتتار دا ءبىلسىن، ول شارالار نە سەبەپتى شەشىلمەي جاتقانىن"، - دەپ جاۋاپ بەردى.

ايتپاقشى، ۇكىمەت ساعاتىندا بەلگىلى تەاتر تارلاندارىنىڭ تابىسى دا جاريا بولدى دەپ حابارلايدى استانا تەلەارناسى.

"رەسپۋبليكالىق دەپ ماڭداي سوعىپ كوكىرەك قاققان، اۋەزوۆ، لەرمونتوۆ تەاترلارىنىڭ ەڭ جوعارعىسى. مىسالى، ءاسانالى ءاشىموۆتىڭ ايلىعى 89 مىڭ تەڭگە"، - دەيدى تۇڭعىشباي جامانقۇلوۆ.

ال ايماقتاردا 30 مىڭنان اسپايتىن ايلىققا قاراپ وتىرعاندار بار كورىنەدى. سودان بولار 8 بىردەي وبلىستا باس رەجيسسەردىڭ ورنى بوس تۇر. تالانتتاردىڭ كوبى تابىس قۋىپ توي-تومالاق جاعالاپ كەتكەنى دە ايتىلدى.

ايتا كەتسەك، مادەنيەت سالاسىنا رەسپۋبليكالىق بيۋدجەتتەن جالپى ىشكى ءونىمنىڭ 0,2 پايىزى عانا قارالعان. ۇكىمەت ساعاتىنان شىققاندار "تۇرمە سالعانشا، تەاتر سالايىق" دەپ تارقاستى.

NUR. KZ