الىپ تاسباقا كوشەدەگىلەردى الەككە سالدى
بۇل تۋرالى gazeta.kz حابارلادى.
اسىقپاي باسار تاسباقانىڭ الەگىنەن قۇتىلۋ ءۇشىن جۇرگىزۋشىلەر جول پوليتسياسىن شاقىرۋعا ءماجبۇر بولعان.
ساراسوتا قالاسىنىڭ شەريفى رونا لوككانىڭ ايتۋىنشا، جاندىكتى كوشەدەن الىپ كەتۋ ءۇشىن سوقتالداي بىرنەشە جىگىت كومەككە شاقىرىلعان. ولار تاسباقانى جۇك كولىگىنە جابىلىپ ءجۇرىپ سالعان. سودان ونى پوليتسيا بولىمىنە جەتكىزگەن.
پوليتسيا قىزمەتكەرلەرى تاسباقانىڭ يەسىن تابىلىپ قالار دەگەن ۇمىتپەن بولعان وقيعانى الەۋمەتتىك جەلى ارقىلى (Facebook) جاريالايدى. قۇقىق قورعاۋ قىزمەتكەرلەرىنىڭ بۇل تالپىنىسى كوپ ۇزاماي ءوز ناتيجەسىن كورسەتەدى. سويتسە، تاسباقانىڭ يەسى رايان ادامس دەگەن ازامات ەكەن. جوعالتقانىن تاپقان راياننىڭ سوزىنە قاراعاندا، «ساۋىت كيگەن ساباز» يەسىنىڭ باقىلاۋىنسىز قالعانىن سەزە قويىپ، ءۇي اۋلاسى قورشاۋىنان ەبىن تابا سىتىلىپ شىعىپ، كوشە كەزىپ كەتكەن.
تاسباقا يەسىنە قايتارىلدى.
جولدىباي بازار.
