بيىل «قازاق ەتنوگرافيالىق ەنتسيكلوپەدياسىنىڭ» بەسىنشى تومى جارىق كورەدى
وندا قازاقتىڭ ءداستۇرلى ەتنوگرافيالىق كاتەگوريالارى، ۇعىمدارى مەن اتاۋلار جۇيەسى جاسالعان.
بۇل تۋرالى بۇگىن مەملەكەتتىك ورتالىق مۋزەيدە وتكەن «ءتىل - ۇلت مادەنيەتىنىڭ قازىناسى» اتتى ءىس-شارا بارىسىندا اتالمىش مۋزەيدىڭ عالىم- حاتشىسى عاليا تەمىرتون مالىمدەدى.
ونىڭ ايتۋىنشا، مەملەكەتتىك ورتالىق مۋزەي قازاق ءتىلىنىڭ دامۋىنا عىلىمي تۇرعىدا ەلەۋلى تۇردە ۇلەس قوسىپ كەلەدى.
«مۋزەيدە قازاق حالقىنىڭ كونە تاريحىنا، مادەنيەتىنە، ەتنوگرافياسىنا قاتىستى مىڭداعان جادىگەرلەر ساقتالعان. سولاردى ءبىر رەتكە كەلتىرىپ، عىلىمي تىزىمدەمەسىن جاساۋ - بىزگە پارىز. 2011 -جىلى ءبىرىنشى تومىن، 2012 - جىلى ەكىنشى جانە ءۇشىنشى تومىن شىعاردىق. بىلتىر ءتورتىنشى تومى باسىلعان. بيىل مىنە، كۇن دەمەي، ءتۇن دەمەي ەڭبەك ەتىپ، بەسىنشى تومىن جارىققا شىعارۋعا كۇش سالىپ جاتىرمىز. بۇل دۇنيەلەر زەرتتەۋشى عالىمدار ءۇشىن تاپتىرمايتىن ەنسيكلوپەديا. ونداعى اتاۋلاردىڭ، ۇعىمداردىڭ بارلىعى عىلىمي تۇرعىدا ابدەن، ەلەپ-ەكشەلىپ، دالەلدەنگەن. ءاربىر كىتاپتا 1200-1300 دەن استام سوزدەر، ۇعىمدار، اتاۋلار، كاتەگوريالار بار. بارلىعى جۇيەلى تۇردە جاسالعان. عالىمدار وزدەرىنىڭ وسىنداي ەڭبەكتەرى ارقىلى قازاق ءتىلىنىڭ دامۋىنا بارىنشا ۇلەس قوسىپ جاتىر»، - دەدى ءوز سوزىندە عاليا تەمىرتون.
ايتا كەتەلىك، الماتىداعى مەملەكەتتىك ورتالىق مۋزەي - بۇكىل ورتالىق ازيا بويىنشا عىلىمي مارتەبەسى بار جالعىز مۋزەي. ياعني، عىلىمي-زەرتتەۋ ينستيتۋتتارىمەن پارا-پار جۇمىس ىستەيدى.
اۆتور: جاپپاربەرگەن ايبوتا
