ۇلى بريتانيا تۇرعىنى بارلىق ەسىكتى بەكىتە الاتىن «قۇلىپ» ويلاپ تاپتى - كەسكىن

استانا. قازاقپارات -  ۇلى بريتانيا تۇرعىنى، 66 جاستاعى بوب فيتسجون كەز-كەلگەن ەسىكتى جابا الاتىن «قۇلىپ» ويلاپ تاپتى.

بولاتتان جاسالعان قۇرىلىم ۇيالى تەلەفوننان جەڭىل. ول ىشكە قاراي اشىلاتىن ەسىكتى بەرىك بەكىتىپ تاستايدى.

ونەرتابىستى حوستەلدەر مەن جاعاجايداعى لاشىقتاردا تۇراتىن ادامداردىڭ قاۋىپسىزدىك شارالارىنىڭ ءبىرى رەتىندە پايدالانۋعا بولادى. ونىڭ ءبىر بولىگى ەسىكتىڭ شەتىنە، ەكىنشىسى ەسىك قورابىنا بەكىتىلەدى، دەپ جازادى The Daily Mail.

Easylock «قۇلپىن» شىعارۋ ءۇشىن ەر ادام IndieGogo سايتىنىڭ 10 مىڭ فۋنت ستەرلينگتەن استام قاراجاتىن جۇمساعان. اۆتورى ونى ساياحاتشى ءۇشىن تاپتىرماس سىي دەپ سانايدى. دەمەۋشىلەرىنە العىس رەتىندە ول دايىن بۇيىمدارىن سىيعا تارتقان.

«اۋەلى نەمەرەلەرىمنىڭ قاۋىپسىزدىگىن، ۋاقىتى كەلگەندە ولاردىڭ الەم ەلدەرىنە ساياحاتتايتىنىن ويلادىم. سوندىقتان ولاردىڭ قاۋىپسىزدىگىن قامتاماسىز ەتكىم كەلدى»، - دەدى بوب فيتسجون.