ەندى «ەر توستىك» ەرتەگىسىنىڭ، «قىز جىبەك» پەن «قوزى كورپەش - بايان سۇلۋ» جىرلارىنىڭ انيماتسيالىق نۇسقاسى شىعادى
بۇل تۋرالى قالا اكىمى احمەتجان ەسىموۆ حابارلادى.
«ەلىمىزدىڭ ەرتەڭىن ۇستار جاس ۇرپاق الدىندا ەلباسى ءۇش ءتىلدى مەڭگەرۋ تۋرالى تاپسىرما قويدى. ول ءۇشىن مەكتەپتەردەگى ءتىلدى ۇيرەتۋ ستاندارتتارىن ءبىر قالىپقا كەلتىرۋىمىز قاجەت. بۇل كۇردەلى جۇمىس. ءبىراق، ۋاقىت بىزدەن سونى تالاپ ەتىپ وتىر. بۇگىنگى تاڭدا ءتىلدى ۇيرەتۋگە ارنالعان تىلدىك ادىستەمەلىك قۇرالدارعا تاپشىلىق جويىلدى. بالاباقشا تاربيەشىلەرى مەن قوعام سۇرانىسىن ەسكەرە وتىرىپ، D3 فورماتىندا جاسالعان قازاق تىلىندەگى مۋلتفيلمدەردىڭ 205 سەرياسى جارىق كوردى. ءبىزدىڭ قالادا، جەرگىلىكتى بيۋدجەت ەسەبىنەن. بۇل ونىمدەر قالاداعى بارلىق بالاباقشالاردا تەگىن تاراتىلىپ، رەسپۋبليكالىق تەلەارنالاردا كورسەتىلىپ كەلەدى»، - دەدى قالا باسشىسى.
الماتى قالاسىنىڭ تىلدەردى دامىتۋ، مۇراعاتتار جانە قۇجاتتاما باسقارماسى وسى باعىتتا جۇمىستى جالعاستىراتىن بولادى. كەلەسى جىلى «ەر توستىك» ەرتەگىسىنىڭ، «قىز جىبەك» پەن «قوزى كورپەش - بايان سۇلۋ» ليرو-ەپوستىق جىرلارىنىڭ انيماتسيالىق نۇسقاسى شىعارىلماق.
«ۇلتتىق ناقىشتاعى مۋلتفيلمدەر - جاس ۇرپاق تاربيەسىنە اسا قاجەت قۇرالداردىڭ ءبىرى. قازاق ەپوستارىنىڭ جەلىسىمەن تۇسىرىلگەن مۋلتفيلمدەر بالالاردىڭ تۋعان ءتىل، ۇلتتىق مادەنيەتكە دەگەن قىزىعۋشىلىعىن ارتتىرادى»، - دەدى اكىم.
ەستەرىڭىزگە سالا كەتەيىك، الماتىدا مەملەكەتتىك تاپسىرىسپەن «سيقىرلى قالام» ينتەراكتيۆتى ءتىل ۇيرەتۋ قۇرالى ەنگىزىلگەن بولاتىن.
بۇل مەكتەپ جاسىنا دەيىنگى بالالارعا ارنالعان جاڭا باعىتتاعى يننوۆاتسيالىق ءتىل ۇيرەتۋ قۇرالى. «سيقىرلى قالام» ارقىلى بالالارعا ءبىر مەزگىلدە وقۋعا، تىڭداۋعا مۇمكىندىك بەرىلەدى. سونداي-اق قالامدى پلاكاتقا تيگىزگەندە، سۋرەتتەرگە «جان ءبىتىپ»، بەينەلەر ەكرانعا كوشىپ، سويلەپ كەتەدى. قالامنىڭ سىرى دا وسىندا.
قازاق جانە اعىلشىن تىلدەرىن ۇيرەتۋگە ارنالعان، وقىتۋ ۇردىسىندە قولدانۋعا وڭتايلى كەشەن الماتى بالاباقشالارىندا وسىمەن ەكىنشى جىل قاتارىنان ءبىلىم قۇرالى رەتىندە پايدالانىلىپ كەلەدى.
اۆتور: گۇلميرا عوسمانالي
