قاراعاندىدا جاتاقحانانىڭ جەتىنشى قاباتىنان قۇلاپ كەتكەن موڭعوليا ازاماتى اجال قۇشتى

قاراعاندى. قازاقپارات - موڭعوليا ازاماتى ە. ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ جاتاقحاناسىنىڭ جەتىنشى قاباتتاعى تەرەزەسىنەن قۇلاپ، مەرت بولدى.

بۇل تۋرالى جوعارى وقۋ ورنىنىڭ تاربيە جۇمىسى مەن الەۋمەتتىك ماسەلەلەر بويىنشا پرورەكتورى سالاۋات كەنتبەك حابارلادى.

«قايعىلى وقيعا جۇما كۇنى كەشكە بولدى. ماعان ۋنيۆەرسيتەتتىڭ قاۋىپسىزدىك قىزمەتىنەن تەلەفون سوعىپ، №1 جاتاقحانادا جەتىنشى قاباتاعى تەرەزەسىنەن ءبىر جىگىتتىڭ قۇلاپ كەتكەنىن حابارلادى. دارىگەرلەر ونىڭ جان تاپسىرعانىن راستادى. قازا بولعان جىگىت ءبىزدىڭ ستۋدەنت ەمەس، موڭعوليانىڭ ازاماتى ايبولات دامىس بولىپ شىقتى. ول وسىعان دەيىن دايىندىق كۋرستارىندا وقىعان، الايدا ۋنيۆەرسيتەتكە وقۋعا تۇسە الماعان» ، - دەدى س. كەنتبەك.

 ونىڭ سوزىنە قاراعاندا، نەگىزگى سەبەپ - جازاتايىم وقيعا.

 «ول قوناقتا بولعان بولمەدە ونىڭ جەرلەستەرى تۇرعان. جولداستارى جىگىتتىڭ تەرەزەنىڭ الدىنا وتىرىپ، وعان ارقاسىمەن سۇيەنبەكشى بولعانىن ايتادى. ول پەردەنىڭ ار جاعىندا تەرەزەنىڭ اشىق تۇرعانىن بايقاماي قالعان. ولار ونى ۇستاپ قالۋعا تىرىسقان، الايدا ۇلگەرمەگەن، ءبارى قاس- قاعىم ساتتە بولعان» ، - دەدى ستۋدەنتتەردىڭ تۇسىنىكتەمەسىن كورسەتكەن پرورەكتور.

 سونىمەن بىرگە ول بوگدە ادامنىڭ جاتاقحاناعا قالاي كىرگەنى انىقتالىپ جاتقانىن جەتكىزدى.

 «دايىندىق كۋرستارىندا وقىعان كەزدە ول سوندا تۇرعان. ۆاحتەردىڭ جانىنان بىلدىرمەي ءوتىپ كەتكەن بولۋى كەرەك نەمەسە ونى الداپ ىشكە قاراي ءوتىپ كەتكەن. جەرلەس دوستارىنىڭ ءبىرىنىڭ سوزىنە قاراعاندا، كەيىن ول جاتاقحانادا قونۋعا رۇقسات سۇراعان» ، - دەيدى پرورەكتور.

جىگىتتىڭ قازاسى جايلى بىردەن ونىڭ قاراعاندىدا تۇراتىن تۋعان- تۋىستارىنا حابار بەرىلدى. وقيعاعا قاتىستى پوليتسيا قىزمەتكەرلەرى تەرگەۋ امالدارىن جۇرگىزىپ جاتىر. سونىمەن بىرگە ءمايىتتى موڭعولياعا جونەلتۋ ماسەلەسى شەشىلۋدە.