استانادا تاتارلاردىڭ ۇلتتىق مەرەكەسى - سابانتوي تويلاندى - كەسكىن
سابانتوي - مىڭ جىلدان استام تاريحى بار ەڭبەك پەن دوستىق مەرەكەسى. ءداستۇر بويىنشا تاتار حالقى بۇل مەرەكەنى جيىن- تەرىم كوپ بولسىن دەگەن ىرىممەن تويلاعان. زامان اعىمىنا قاراي وزگەرىسكە ۇشىراپ، دامىتىلىپ، زاماناۋي رەڭككە يە بولعان مەرەكە بۇگىندە يۋنەسكو- نىڭ مادەني مۇرا جاۋھارلارى تىزىمىنە ەنگەن. شارا بارىسىندا ۇلتتىق اندەر مەن بيلەر ورىندالىپ، بايقاۋلار مەن سپورتتىق جارىستار ۇيىمداستىرىلادى.
استانا مەن قازان قالالارىنىڭ اراسىنداعى باۋىرلاستىق ورناعان 10 جىلدىڭ ىشىندە سابانتوي مەرەكەسى ەلوردادا بىرنەشە مارتە وتكىزىلگەن بولاتىن. بۇگىنگى تاڭدا قالادا 11 مىڭنان استام تاتار ۇلىسىنىڭ وكىلى تۇرىپ جاتىر.
سابانتوي اياسىندا تاتارستان رەسپۋبليكاسىنىڭ ونەركاسىپتىك جانە اۋىلشارۋاشىلىق الەۋەتىن كورسەتەتىن جانە ساندىك- قولدانبالى قولونەر بۇيىمدارىنىڭ ساۋدا- كورمەلەرى ۇيىمداستىرىلدى. وندا باۋىرلاس مەملەكەتتىڭ اۋىل شارۋاشىلىق وندىرۋشىلەرىنىڭ ونىمدەرى ساتىلدى.
تاتارستان ونەر شەبەرلەرىنىڭ كونسەرتتىك باعدارلاماسىندا قالا تۇرعىندارى مەن قوناقتارى ءۇشىن «قازان» بي ءانسامبلى، «تاتارستان» ءانسامبلى، «ۆوروجەيا» ورىس اندەرى ءانسامبلى، «شارم» شوۋ تەاترى، «شايان» حالىقتىق بي ءانسامبلى، «كريستالل» ، «ەلمەتەم» ، «كامسكيە زوري» بي انسامبلدەرى مەرەكەنىڭ كوركىن قىزدىردى.
سونداي- اق مەرەكەلىك ساحنادا البەرت سادردينوۆ، يۆان چەرنوۆ، مارسەل ۆاگيزوۆ، رەگينا ۆاليەۆا، رۋستەم ماليكوۆ، سايدا مۋحامەتزيانوۆا، گەورگيي يبۋشيەۆ، باحتيار وماروۆ، السۋ سايفۋللينا، زۋحرا نازيپوۆا، حامدۋنا تيمەرگاليەۆالار ونەر كورسەتتى.
