اگەنتتىكتىڭ ەكس-باسشىسىنا قيناۋ ءادىسى قولدانىلىپ جاتىر - قوعامدىق قورعاۋشى

استانا. قازاقپارات - قازاقستاننىڭ تابيعي مونوپوليالاردى رەتتەۋ اگەنتتىگىنىڭ بۇرىنعى باسشىسى مۇرات وسپانوۆتىڭ تۋعان باۋىرى، ءارى قوعامدىق قورعاۋشىسى بايان تۇتقىندالعان ازاماتقا قاتىستى قيناۋ ادىستەرى قولدانىلىپ جاتقانىن ايتىپ، ق ر باس پروكۋرورى اسحات داۋىلبايەۆقا شاعىمداندى، - دەپ حابارلايدى "ينتەرفاكس-قازاقستان".

"مەنىڭ باۋىرىم ءۇش اي بويى تەرگەۋدە وتىر، بۇقارالىق اقپارات قۇرالدارى ارقىلى ونىڭ پارا الىپ جاتقان كەزدە ۇستالعانى حابارلاندى. قارجى پوليتسياسى بار كۇشىن سالىپ، ونىڭ كىناسىن دالەلدەۋگە تىرىسىپ جاتىر، بولىپ جاتقان جاعدايلارعا قاراعاندا، ولار ءوز ماقساتىنا جەتۋدە ەشنارسەدەن تايىنبايدى"، - دەلىنگەن قورعاۋشىنىڭ وتىنىشىندە.

"جۋىردا مەنىڭ باۋىرىما ول ۇستالعاننان كەيىن ەكىنشى كۇنى اگەنتتىك عيماراتىندا جاسىرىن كامەرامەن تۇسىرىلگەن بەينەجازبا ۇسىنىلدى، وندا مەنىڭ اعام ءوز-وزىنە ۇقسامايدى. بەينەجازبادان ونىڭ وڭ قولىنىڭ تاڭىلعانى كورىنىپ تۇر، ول قولىنا قاسىق ۇستاي المايدى. ونىڭ يىعىندا بىرەۋدىڭ كۇرتەسى بار، ول مۇنى قايدان العانىن بىلمەيدى. ونىڭ ۇستالعان كەزدە كيگەن كيىمى (پيدجاك پەن كويلەك) جىرتىلعان، ءارى قان، بەينەجازبا تۋرالى ايتقان اعام بۇل تۋرالى تەرگەۋشىگە حابارلادى. ونىڭ كيىمى جوعالعان، ول ءۇش كۇن وتىرعان ۋاقىتشا ۇستاۋ يزولياتورىندا دا جوق"، - دەيدى ول.

قوعامدىق قورعاۋشىنىڭ ايتۋىنشا، ۇستاۋ حاتتاماسىنا سايكەس، 2014 - جىلدىڭ 1 - شىلدەسىندە ول اگەنتتىك عيماراتىنا ەشقانداي جاراقاتسىز، ساپ-ساۋ كەلگەن، ۋاقىتشا ۇستاۋ يزولياتورىنا سونداي كۇيدە قامالدى. "ونىڭ ۇستىندە قارا ءتۇستى ىسكەرلىك كوستيۋم، اشىق كوگىلدىر ءتۇستى كويلەك، گالستۋك، قارا تۋفلي، بەلدىك، قولساعات بولدى"، - دەيدى وسپانوۆا.

ول مۇرات وسپانوۆتىڭ ۇستالعاننان كەيىن ەكىنشى تاۋلىكتىڭ سوڭىنا قاراي عانا تاماقتاندىرىلعانىن ايتتى. "باياندالعان جايتتاردىڭ نەگىزىندە ازاپتاۋ ءادىسىن قولدانىپ، زاڭسىز جاۋاپ الۋ دەرەگى بويىنشا شۇعىل شارا قولدانۋدى سۇرايمىن"، - دەلىنگەن باس پروكۋراتۋراعا جازىلعان وتىنىشتە.

بۇعان دەيىن تۇتقىندالۋشىنىڭ ادۆوكاتى حاميدا ايتقاليەۆا تەرگەۋ بارىسىندا ءوز قورعاۋىنداعى ازاماتتىڭ سوققىعا جىعىلعانىن مالىمدەگەن بولاتىن. قارجى پوليتسياسى بۇل اقپاراتتى جوققا شىعاردى.

قارجى پوليتسياسىنىڭ مالىمەتىنشە، وسپانوۆ قاشىپ كەتۋگە ارەكەتتەنگەن، بۇل ارەكەتىنىڭ جولى كەسىلدى. ولاردىڭ ايتۋىنشا، ت م ر ا-نىڭ بۇرىنعى باسشىسى قارسىلىق كورسەتكەن، سونىڭ ناتيجەسىندە جەرگە قۇلاعان وسپانوۆ پەن قارجى پوليتسياسىنىڭ قىزمەتكەرى دەنە جاراقاتتارىن الدى.

سوت مۇرات وسپانوۆتى تۇتقىنداۋعا 2014 - جىلدىڭ 3 - شىلدەسىندە سانكسيا بەرگەن بولاتىن. قارجى پوليتسياسى وعان تابيعي مونوپوليا سۋبەكتىسىنە جاردەم بەرۋ جانە قورعان بولۋ ءۇشىن 300 مىڭ دوللار كولەمىندە پارا الدى دەگەن ايىپ تاقتى. ول ۋاقىتشا ۇستاۋ يزولياتورىنان تەرگەۋ يزولياتورىنا قامالدى.

tengrinews.kz