عالىمدار: كۇندەلىكتى تۇتىنىپ جۇرگەن كەي سۋسىندار قانت ديابەتىنە شالدىقتىرادى

استانا. قازاقپارات - يزرايلدەگى ۆەيتسمان اتىنداعى عىلىمي-زەرتتەۋ ينستيتۋتىنىڭ زەرتتەۋشىلەرى ديەتالىق سۋسىنداردىڭ قۇرامىنداعى از كالوريالىق تاتتىلەندىرگىشتىڭ سالماقتىڭ ارتۋى مەن سۋساقتىڭ (قانت ديابەتىنىڭ) تۋۋىنا سەبەپكەر بولاتىنىن مالىمدەدى، دەپ حابارلادى Day.Az FederalPost قا سىلتەمە جاساپ.

بريتانيالىق Daily Mail باسىلىمى حابارلاعانداي، قانتتى الماستىرعىش زاتتار جانۋارلاردا سۋساقتىڭ العاشقى بەلگىلەرىنىڭ تۋدىرعانىن بايقاپ، زەرتتەۋشىلەر تاجىريبەنىڭ ەكىنشى كەزەڭىن ادامداردىڭ قاتىسۋىمەن جاساعان. ولار جاساندى تاتتىلەندىرگىشتى پايدالانعان 400 ادامدى زەرتتەپ، ولاردىڭ ورگانيزمىندە وزگەرىس بولعانىن اڭعارعان. بۇل ادامداردىڭ سالماعى ارتىپ، گليۋكوزاعا توزىمدىلىگىنىڭ بۇزىلعانىن بايقاعان.

يزرايلدىك ارىپتەستەرىنىڭ زەرتتەۋ ناتيجەلەرىمەن تانىسقان بريتانيالىق عالىمدار بۇل ناتيجەگە مۇقيات قاراۋعا شاقىرىپ، ەڭ پايدالى سۋسىن سۋ ەكەنىن اتاپ ءوتتى.