سەمەيدەگى ءىرى تەرى وڭدەۋ كاسىپورنى تىعىرىقتان شىقتى
قازىرگى ساتتە كاسىپورىن شيكىزات جەتكىزۋشىلەرمەن كەلىسسوزدەر جۇرگىزىپ جاتىر، سونداي-اق وڭىردەگى بارلىق مال ءوسىرۋ شارۋاشىلىقتارىمەن جانە قاساپحانالارمەن ۇزاق مەرزىمدى ارىپتەستىك ورناتۋ قاراستىرىلۋدا.
«ۇزاق جىلدىق بانك قۇرىلىمدارىمەن بولعان قيىندىقتاردان كەيىن كاسىپورىن ءوز ءىسىنىڭ دۇرىس ەكەندىگىن دالەلدەدى. ەندى تولىققاندى جۇمىسقا كىرىسە الادى. قازىرگى ساتتە كومبينات نەبارى 20 پايىزدىق قۋاتپەن جۇمىس ىستەپ تۇر. 2015 - جىلعا قاراي نىسان 100 پايىز كۇشىنە ەنبەك، ياعني كۇنىنە 34 توننا تەرى وڭدەلمەك»، دەيدى ج ش س ديرەكتورى جۇماعازى راحىمعاليەۆ.
ونىڭ ايتۋىنشا، كاسىپورىننىڭ ءونىمى تولىقتاي ەكسپورتقا نەگىزدەلگەن. بۇل جەردە وڭدەلگەن تەرىلەر قىتاي، ينديا جانە يتاليادا ۇلكەن سۇرانىسقا يە.
كاسىپورىن اتالعان ەلدەر مەن شيكىزاتتى جەتكىزۋشىلەرمەن ۇزاق مەرزىمدى كەلىسىمدەر جاساسقان. «جاقىن بولاشاقتا كومبينات ش ق و-دا سويىلعان مالداردىڭ، سونىڭ ىشىندە قوي، جىلقى تەرىلەرىن الۋدى كوزدەپ وتىر. جىلقى تەرىسى اسكەري اياق كيىم تىگۋگە جۇمسالادى، ال قوي تەرىسىنەن تون، شۋبا تىگىلەدى»، - دەيدى مەكەمە باسشىسى.
كاسىپورىن تولىق قۋاتپەن جۇمىس جاسايتىن بولسا، 40 مىڭعا جۋىق تەرى وڭدەۋ سالاسىنا قاتىستى مامانداردى جۇمىسقا تارتۋعا مۇمكىندىك بەرەدى. ولاردىڭ ىشىنە ەتىكشىلەر، تەرى تىگىنشىلەرى، ديزاينەرلەر سىندى ماماندار كىرەدى.
