مينيستر باستى ءرولدى ايەلى سومداپ، ءوز پەساسىن قوياتىن تەاتر جەتەكشىلەرىن سىنعا الدى

استانا. قازاقپارات - كەيبىر تەاتر باسشىلارى ءوز پەساسىن ساتىپ الادى.

سودان كەيىن اقشا تابۋ ءۇشىن ءوزى رەجيسسەر بولادى.

باستى رولدە سۇيىكتى جارى جانە ءوزى دە وينايدى.

بۇل تۋرالى بۇگىن ق ر پارلامەنتى ماجىلىسىندەگى ۇكىمەت ساعاتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتتى.

«قازىرگى ۋاقىتتا بىزدە 9 وڭىرلىك تەاتردا باس رەجيسسەر جەتىسپەيدى. سونىمەن قاتار باس رەجيسسەردىڭ لاۋازىمىن كاسىبي ءبىلىمى جوق ادامدار اتقارعانى جايىندا دا دەرەكتەر بار.

قازىرگى ۋاقىتتا مادەنيەت جانە سپورت مينيسترلىگى 2 ناقتى جۇيە ۇسىنىپ وتىر. ءار تەاتردا كلاسسيكالىق تۇرعىدان ديرەكتور بولۋى كەرەك. ەكىنشىدەن، كوركەمدىك جەتەكشى بولۋى ءتيىس. مۇنداي ساياسات بۇكىل دۇنيە جۇزىندە بار»، - دەدى ول.

ءمينيستردىڭ اتاپ وتۋىنشە، تەاترلاردىڭ باسىم بولىگىندە، ياعني 70 پايىزىندا ديرەكتوردىڭ قويىلىمدارى ساحنالانۋدا. ال مۇنداي ولقىلىقتارعا جول بەرمەۋ قاجەت.

«ديرەكتور بولعان سوڭ ءوز پەساسىن ساتىپ الادى. سودان كەيىن اقشا تابۋ ءۇشىن ءوزى رەجيسسەر بولادى. باستى رولدە سۇيىكتى جارى جانە ءوزى دە وينايدى»، - دەدى ا. مۇحامەدي ۇلى.

اۆتور: مارلان جيەمباي