قازاقستاندىق «الما وتانى» جانە «حالىقارالىق عارىش ستانسياسى» مونەتالارى حالىقارالىق بايقاۋدا جەڭىمپاز اتاندى
بۇل تۋرالى ق ر ۇلتتىق بانكىنىڭ باسپا ءسوز قىزمەتى حابارلادى.
«الما وتانى» مونەتاسى «كادەسىيلىق مونەتا» نوميناتسياسىندا ءبىرىنشى ورىن الىپ، 2014 -جىلدىڭ ەڭ ۇزدىك كادەسىيلىق مونەتاسى بولىپ تانىلدى، ال «حالىقارالىق عارىش ستانتسياسى» مونەتاسى «بىرەگەي تەحنولوگيا» نوميناتسياسىندا جۇلدەلى ءۇشىنشى ورىندى يەلەندى.
«قازىلار القاسىنىڭ تاڭداۋ جاساۋى قيىن بولدى، سەبەبى بايقاۋعا 31 ەلدىڭ 2013 - جىلعى 1- قاڭتار - 31 - جەلتوقسان ارالىعىندا شىعارىلعان شامامەن 260 ەسكەرتكىش مونەتاسى جانە 25 مونەتالار سەرياسى قاتىستى.
ايتا كەتەرلىك جايت، قازاقستان رەسپۋبليكاسى ۇلتتىق بانكىنىڭ «الما وتانى» كوللەكسيالىق كۇمىس مونەتاسى ءۇشىن بۇل - وسىنداي بەدەلدى كونكۋرستاردا العان ەكىنشى ۇلكەن جەڭىس»، - دەلىنگەن حابارلامادا.
«الما وتانى» مونەتاسى اينالىسقا 2013 - جىلعى 13 - قاراشادا شىعارىلدى. وسىدان ءۇش اي بۇرىن 11 - 17 - مامىر ارالىعىندا مەحيكو قالاسىندا (مەكسيكا) 28- مونەتا سارايلارى ديرەكتورلارىنىڭ كونفەرەنسياسى شەڭبەرىندە وتكەن ەسكەرتكىش مونەتالاردىڭ حالىقارالىق بايقاۋىندا دا مونەتا «2014 -جىلدىڭ ەڭ ادەمى كۇمىس مونەتاسى» نوميناتسياسىندا باس جۇلدە العان بولاتىن.
ال «حالىقارالىق عارىش ستانسياسى» مونەتاسى اينالىسقا 2013 - جىلعى 18 - قازاندا كوپ ماقساتتى عارىشتى زەرتتەۋ كەشەنى رەتىندە پايدالانىلاتىن ۇشقىش باسقاراتىن وربيتالىق ستانسيا - حالىقارالىق عارىش ستانتسياسىنىڭ (ح ع س) قۇرمەتىنە شىعارىلعان بولاتىن.
ح ع س - بىرلەسكەن حالىقارالىق جوبا، وعان 15 ەل (ءالىپبي رەتىمەن): ا ق ش، بەلگيا، برازيليا، گەرمانيا، دانيا، جاپونيا، يسپانيا، يتاليا، كانادا، نيدەرلاند، نورۆەگيا، رەسەي، فرانسيا، شۆەيتساريا، شۆەتسيا قاتىسادى.
مونەتانىڭ ىشكى ديسكىسى تانتالدان، سىرتقى ساقيناسى كۇمىستەن جاسالعان. مونەتالاردى دايىنداۋ كەزىندە العاش رەت تانتالدىڭ ءتۇسىن وزگەرتۋ تەحنولوگياسى قولدانىلدى.
اۆتور: گۇلميرا عوسمانالي
