ورالماندارعا ارنالماعان كينو
قىتايدا تۇراتىن قانداستار. بالاقايدىڭ اتا-اجەسى، تۋىستارى قازاقستانعا قونىس اۋدارىپتى. ءوزى تاريحي وتانىنا العاش رەت كەلە جاتىر.
كەدەندە قۇجاتتارىمىزدى، كوتەرگەن جۇگىمىزدى تەكسەردى. قىتاي جاعى ۇزاقتاۋ ۇستادى. ءبىزدىڭ كەدەنشىلەر تەز جىبەردى. وسىعان شامدانعان ورىس ءتىلدى ءبىر قازاق: «قىتايلاردى نەگە دۇرىستاپ تەكسەرمەيسىڭدەر؟ ولار ءبىزدى ۇزاق ۇستادى عوي»، - دەپ قالدى.
اڭ-تاڭبىز. ارا-مىزداعى «قىتاي» كىم دەپ، ءبىر-بىرىمىزگە قارايمىز. سويتسەك، «قىتاي» دەگەن اتاجۇرتقا كەلە جاتقان انا مەن بالا ەكەن. ءبىراز ادام ءوز قازاعىن «قىتاي» دەگەن الگىمەن ايتىسا كەتتى. ۋ دا شۋ. بالاقاي مەن اناسى ورىسشا ۇرىسقان قازاقتارعا تاڭدانا قارايدى. ورىسشا بىلمەسە دە، اڭگىمەنىڭ وزدەرىنە قاتىستى ەكەنىن ىشتەرى سەزەدى.
ءبىر كەزدە بالاقاي مەنەن:
- اعا، مىنا كىسى نە دەيدى؟ ءبىزدى ايتىپ جاتىر ما؟ - دەپ سۇرادى.
اۋزىمدى اشا بەرگەنىم سول ەدى، قاسىمدا تۇرعان قاريا:
- جوق، قاراعىم، سەندەردە نەسى بار؟ كەدەنشىنى ايتادى، - دەپ جاۋاپ بەردى.
سىرتقا شىققان سوڭ، قاريا:
- انا بالا ەلىنە كەلە جاتىر. ەگەر وعان «سەنى بىرەۋ قىتاي دەپ جاتىر» دەسەك، جۇرەگى اۋىرىپ قالار ەدى، - دەپ قۇلاعىما سىبىرلادى.
وسى وقيعانى كوپكە دەيىن ۇمىتا الماي ءجۇردىم. ەلىمىزگە جىل سايىن مىڭداعان ورالمان اعايىن كوشىپ كەلەدى. ءبىر ەلدەن ءبىر ەلگە قونىس اۋدارۋ قايدان وڭاي بولسىن؟! تالاي قازاق بالاسى قينالىپ ءجۇر. دەگەنمەن، جىلاپ جۇرگەن ولار جوق. سان سالادا ەڭبەك ەتىپ، قوعامنان ءوز ورىندارىن تابۋدا.
وتكەندە كەشكىسىن ءبىر ورالمان ارىپتەسكە قوڭىراۋ شالدىم.
- نە ىستەپ جاتىرسىڭ؟ - دەسەم:
- جاتىرمىن، ورالماندارعا ارنالماعان كينو كورىپ، - دەيدى.
- ول قانداي كينو؟
- كادىمگى ءوزىمىزدىڭ قازاقتار تۇسىرگەن سەريال عوي. جارتىلاي قازاقشا، جارتىلاي ورىسشا. ءبىز سەندەر سەكىلدى ورىسشاعا جەتىك ەمەسپىز. سوسىن ونى «ورالماندارعا ارنالماعان كينو» دەيمىز، - دەپ كۇلىپ جاتىر.
ارىپتەستىڭ مۇنىسى - ءازىل. ءبىراق، ءزىلى بار ءازىل. راسىندا، بۇگىندە كەيبىر كينو ەكى تىلدە «سويلەيتىن» بولدى. ءومىردى شىنايى بەينەلەگەندەرى مە، كىم ءبىلسىن، ايتەۋىر، سەريال تۇسىرەتىندەر وسى ادىسكە كوشىپ الدى. ورىسشا ءماتىندى دۋبلياجداپ، تىم بولماسا، سۋبتيترمەن بەرۋ دەگەن ەشكىمنىڭ ويىنا كەلەر ەمەس. ءسىرا، كينوگەرلەر دە، تەلەارنا باسشىلارى دا كۇللى قازاقتىڭ ورىسشاعا جۇيرىك ەكەنىنە سەنىمدى سەكىلدى.
مىنە، سولاي! كينو ەكەش كينونىڭ ءوزى «شالاقازاق» بۇگىندە. تالاي قانداستىڭ جۇرەگىن اۋىرتىپ ءجۇر- اۋ وسى ءجايت.
"ۇلان" گازەتى
اۆتور: باعدات ءماجيتوۆ
