قازاقستان جول پوليتسيا قىزمەتكەرلەرى قولداناتىن تاياقتان باس تارتپاق
«جالپى، وسى پوليتسيا تاياعىنىڭ قاجەتى قانشا؟ مەنىڭشە، بۇل ماي كەزىنەن قالعان تاريحي يدەيا. ءتىپتى، ءبىر جاعىنان الىپ قاراعاندا، ونى بيلىك قۇرالى دەسەك تە بولادى. سوندىقتان دا ءبىز زاڭ بويىنشا ىسقىرىق بار ەكەنىن ايتامىز. ونى پايدالانۋعا بولادى. قولمەن دە كورسەتۋگە بولادى. ولاي بولسا، تاياقتان بىرتىندەپ باس تارتايىق»، - دەدى ءبىرىنشى ۆيتسە-پرەمەر.
ونىڭ سوزىنە قاراعاندا، 2017-جىلدىڭ قاڭتارىنا دەيىن بىرتىندەپ تاياق قولدانىستان شىعارىلاتىن بولادى.
«جولدىڭ ورتاسىندا، كوشەنىڭ قيىلىسىندا تۇرىپ، قوزعالىستى رەتتەيتىن بولساڭ، وندا ول ءۇشىن تاياقتىڭ قاجەت ەكەندىگى تۇسىنىكتى. ال جول بويىندا تۇرىپ، كولىكتى توقتاتۋ، ءوز بيلىگىڭدى كورسەتۋ، رولدە وتىرعان ادامنان ءوزىڭنىڭ جوعارى ەكەندىگىڭدى پاش ەتۋ ءۇشىن تاياق پايدالانۋ - بۇل ەندى تەڭسىزدىك»، - دەدى ب. ساعىنتايەۆ.
سونىمەن قاتار، ول بۇگىنگى تاڭدا جول پوليتسيا قىزمەتكەرلەرىنىڭ ازايۋى تەندەنتسياسى بايقالىپ كەلە جاتقاندىعىن باسا ايتتى.
«پوليتسيا قىزمەتكەرلەرىنىڭ جول بويىندا تۇرىپ، باقىلاۋ جۇرگىزبەۋى ءۇشىن ءبىز كوشەلەردى بارىنشا ۆيدەوكامەرالارمەن جابدىقتاۋىمىز قاجەت. ياعني، ءبىز بارلىعىن دا جەدەل باسقارۋ ورتالىعى ارقىلى قاداعالاپ وتىرۋىمىز كەرەك»، - دەدى ءبىرىنشى ۆيتسە-پرەمەر.
اۆتور: مارلان جيەمباي
