قازاقستان استانانى كۇمبەزبەن قورشاي ما؟

استانا. قازاقپارات - استانا قالاسىنىڭ اكىمى يمانعالي تاسماعانبەتوۆ «قازاقستاننىڭ تابيعاتى سۇلۋ ءارى جانعا جايلى» دەيدى. ول استانا قالاسىن قالقالاپ كۇمبەزبەن جابۋ تۋرالى ويدى«قيسىنسىز» سانايدى.

«بۇل جەردە سۇلۋ تابيعاتتى، كەڭ دالانى، جانعا جايلى اۋانى بۇركەمەلەپ كەرەگى نە، - دەگەن ساۋال تۋىندايدى. مەنىڭشە، قالانى كۇمبەزبەن قالقالاۋ تىپتەن قيسىنسىز وي» دەدى تاسماعامبەتوۆ جالپىقالالىق سەنبىلىكتە Tengrinews.kz ءتىلشىسىنىڭ قويعان ساۋالىنا.

ول استانانىڭ اۋا-رايىندا وزىندە جايسىز سەزىنبەيتىنىن جەتكىزدى.

«مەن اتىراۋدا تۋدىم. تابيعاتى سۋىق، قىسى وتە قاتتى، قارى از جاۋاتىن، ەسەسىنە جەلى كۇشتى سوعاتىن تۋرا استانانىڭ تابيعاتىنا ساي كەلەتىن ايماقتا ءوستىم. سوندىقتان مەن استانانىڭ اۋا-رايىنا ءوزىمدى جايسىز سەزىنبەيمىن. مۇنداعى تابيعات سۇلۋ ءارى جانعا جايلى. ەشقانداي ماسەلە جوق» دەدى تاسماعامبەتوۆ.

سەنبىلىك بارىسىندا اكىم ءوزىنىڭ جىلى كۇرتەشەسىن شەشىپ تاستاپ بىرنەشە تال ەكتى.

«استانادا بۇگىن اۋا-رايى پليۋس 13 گرادۋستى كورسەتۋى كەرەك. مەنىڭشە، اۋا-رايى قۇبىلادى. دەسەك تە سەنبىلىككە ءبىراز قاۋىم جينالدى» دەدى ول. سەنبىلىككە قاتىستى اكىمشىلىكتىڭ مالىمەتىنشە، شاراعا 95 مىڭ ادام قاتىسقان.

«سەنبىلىك ادامداردى جاۋاپكەرشىلىككە، تازالىققا ۇيرەتەدى. ءاربىر سەنبىلىككە شىققان سايىن ادام وسىنى سەزىنەدى دەپ ويلايمىن. قالامىزدى تازا ۇستاۋ ءۇشىن مۇنداي جاۋاپكەرشىلىكتى سەزىنۋ بىزگە قاجەت» دەيدى ول.

ەسكە سالايىق، استانانى كۇمبەزبەن قالقالاۋ يدەياسى ب ا ق-تا 2012-جىلدان بەرى كوتەرىلىپ كەلەدى. ساۋلەتشىلەر وسىنداي كونسترۋكتسيانى سالۋ سالقىن اۋا رايىنىڭ پروبلەماسىن تولىق شەشىپ، قالاعا ميلليونداعان تۋريستەردى تارتۋعا مۇمكىندىك بەرەدى دەگەن پىكىردە.

دەگەنمەن استانا بيلىگى قالانىڭ كليماتىن جايلى ەتۋ ءۇشىن بۇدان وزگە دە شارالاردى قاراستىرۋدا.

بۇل رەتتە قازاقستان پرەزيدەنتى نۇرسۇلتان نازاربايەۆ قالانىڭ تابيعاتىن جايلى ەتۋ ماقساتىندا «جاسىل بەلدەۋ» يدەياسى وڭ ناتيجە بەرىپ كەلەتىنىن ايتقان بولاتىن.

نۇرسۇلتان نازاربايەۆ 2013-جىلى بۇعان قاتىستى «بىرىنشىدەن، قالانىڭ ىشىندە شاڭ-توزاڭ جوق. ەكىنشىدەن، قالانى اينالا ورمان سالۋ بوران مەن جەلدەن ساقتايدى. قازىر قالادا قاتتى جەل، بوران سوعۋ ازايدى» دەگەن ەدى.