تاڭعاجايىپ جولداردا دا جولدار بار

استانا. قازاقپارات - وركەنيەتتىڭ دامۋىمەن ادامزاتتىڭ جولعا قاجەتتىلىگى ارتا ءتۇستى.

قازىرگى زاماناۋي جولداردىڭ ورنىندا بۇرىندارى جاياۋ سوقپاق، ات اربا جولى بولۋى مۇمكىن.

ولار بۇگىندە اسا ماڭىزدى مەملەكەتتىك ينفراقۇرىلىمعا اينالعان.

«ءولىم جولى»

حالىقارالىق قاۋىپسىز جول ساياحاتى قاۋىمداستىعىنىڭ پايىمداۋىنشا، الەمدەگى ەڭ قاۋىپتى جول -  بوليۆياداعى «ءولىم جولى». اند تاۋلارىنىڭ جاقپار قۇزىن جاعالاي وتەتىن بۇل جولدىڭ لا-پاس ي كورويكو ەلدى مەكەندەرىن جالعاپ تۇرعان 70 شاقىرىمدىق بولىگىنەن جىل سايىن 25 كولىك قۇلاپ، ەكى جۇزگە جۋىق ادام كوز جۇمادى ەكەن.

«North Yungas Road» جولى سولتۇستىك بوليۆيانى استانامەن بايلانىستىرىپ جاتقان از مارشرۋتتاردىڭ ءبىرى. كەيبىر دەرەكتەر ونى 1930 - جىلدارى پاراگۆايلىق تۇتقىندار سالعان دەسە، كەلەسىسى 70-جىلدارى امەريكالىق قۇرىلىس كومپانياسى ىستەگەن دەيدى.

بۇل جول 3,6 مىڭ مەتر بيىكتىكتەن تەڭىز دەڭگەيىنە دەيىنگى 330 مەترگە دەيىن تومەن تۇسەدى. تىك جاردى جاعالاي وتەتىن جول وتە تار جانە بۇرالاڭ. ءتىپتى كەيبىر جەرلەرىندە قاراما-قارسى كەلە جاتقان ەكى كولىك سىيماي قالادى. ءجيى تۇسەتىن قالىڭ تۇماننىڭ كەسىرىنەن الداعى بىرنەشە مەتر جەر عانا كورىنەدى.

ونىڭ ۇستىنە ءجيى جاۋاتىن تروپيكالىق جاۋىنداردىڭ اسەرىنەن كوشكىن ءجۇرىپ، جولدىڭ شەتىن شايىپ تا كەتۋى مۇمكىن. «ءولىم جولى» دەگەن اتاۋعا 1999 - جىلى يە بولعان. 8 يزرايلدىك تۋريست وتىرعان اۆتوكولىك قۇزعا قۇلاپ، مەرت بولادى.

دەگەنمەن، وعان دەيىن دە وتە اۋىر اپاتتار بولىپ تۇرعان. ماسەلەن، 1983 - جىلى كانونعا ىشىندە 100 شاقتى جولاۋشىسى بار اۆتوبۋس قۇلاپ كەتكەن. وسى جولداعى قاۋىپتىلىكتىڭ جوعارىلىعى ونى تۋريستەر ءۇشىن تارتىمدى ەتىپ تۇر. ءتىپتى كەيبىر تاۋ ۆەلوسيپەدى مەن جول تاڭدامايتىن كولىك ءمىنىپ، كەيبىر جەردە جىلدامدىقتى ساعاتىنا 80 شاقىرىمنان دا اسىرادى.

الايدا ەلدىڭ ءبارىنىڭ جولى بولا بەرمەيدى... ساپاسى جاقسى جولداردىڭ كوپ بولۋى ەلدىڭ ەكونوميكالىق قۋاتتىلىعىن، مەملەكەتتىك الەۋەتىن كورسەتەدى. الەمدە ءتۇرلى ولشەمدەگى، سيپاتتاعى، ماڭىزدىلىعى ءارتۇرلى جولدار كوپ. كەيبىرى قالالاردى بايلانىستىرسا، كەلەسىسى تاۋ مەن جازىق دالانى ارالايدى. دەگەنمەن، تەك بايلانىس قۇرالى عانا ەمەس، ۇلكەن ارحيتەكتۋرالىق ونەر ۇلگىسىنە اينالعان جولدار دا بار. ولار اركەز وزىنە تۋريستەردى تارتىپ تۇرادى.

ەڭ بۇرالاڭ جول

ماسەلەن، ءالپى تاۋلارىنىڭ شىعىس جاعى، ستەلۆيو اسۋىنداعى جول تەڭىز دەڭگەيىنەن 2,7 شاقىرىم بيىكتىكتە جاتىر. بۇل جولدى ءجۇرىپ ءوتۋ ءۇشىن جولدىڭ 60 تان اسا شۇعىل بۇرىلىسىنان ءوتۋ كەرەك. بۇرالاڭ جولداعى كاۋىپ تە جوعارى. دەگەنمەن، تاۋدىڭ ەرەكشە تابيعاتىن تاماشالاعىسى كەلگەندەر مۇنداي قيىن ساپاردان باس تارتپايدى. ال قىتايدىڭ حۋنان پروۆينتسياسىنداعى جولدى تۇرعىندار «اسپانعا اپاراتىن جول» اتاپ كەتكەن. جالپى ۇزىندىعى 10 شاقىرىمدى قۇرايتىن تاس جول اسپانمەن تىلدەسكەن تاۋ بوكتەرىندە جاتىر. ءبىر قاراعاندا تۋرا اسپانعا اپاراتىنداي كورىنەدى. 2006 - جىلى پايدالانۋعا بەرىلگەن جولدىڭ قۇرىلىسى 8 جىل بويى جۇرگەن ەكەن. 99 بۇرىلىستان تۇراتىن جول بويىنداعى پەيزاج كوز تارتارلىق. مۇنداي اسۋلار قازاقستاندا دا بارشىلىق. قورداي، باسقان، التىن-ەمەل اسۋلارى قىستىڭ كۇندەرى اسۋ بەرمەي كەتەدى.

جوعارى جىلدامدىق

گەرمانيانىڭ قالاارالىق اۆتوباندارىندا ەڭ جوعارى جىلدامدىقپەن جۇيتكۋگە بولادى. نەمىس جولدارىنىڭ 50 پايىزىندا جوعارى جىلدامدىققا شەكتەۋ قويىلماعان. ال ەڭ تومەنگى جىلدامدىقتى ساعاتىنا 60 شاقىرىم ۇستاپ وتىرۋىڭ شارت. مۇنداي جىلدامدىقپەن جۇرە المايتىن كولىكتەر اۆتوباندى «اينالىپ وتەدى». دەگەنمەن، ساعاتىنا 130 شاقىرىم جىلدامدىق جوعارى جىلدامدىق دەپ ەسەپتەلىنەدى. ويتكەنى وتە جوعارى جىلدامدىقتا كەلە جاتقان كولىكتى باسقارۋ وڭاي ەمەس.

ەڭ قىمبات جوبا

بوستون ۇلكەن توننەلى - جول سالاسىنداعى ەڭ قىمبات جوبا سانالادى. العاشىندا بۇل جوبانىڭ قارجىلىق قۇنى 2,8 ميلليارد دوللار بولادى دەپ جوسپارلانعانىمەن، 1985 - جىلعا قاراي قۇنى 15 ميلليارد دوللارعا جاقىنداعان. الەم ەلدەرىنىڭ اراسىندا بۇرىن-سوڭدى سالىنعان ەڭ قىمبات جولعا اينالدى. قۇرىلىس 1991 - جىلى باستالىپ، تەك 2007 - جىلى اياقتالعان. قۇرىلىس كەزىندە ادام ءولىمى دە بولعان.

ەڭ قيىن جولايرىق

ا ق ش-تىڭ لوس-انجەلەس قالاسىنداعى گارري پرەگەرسون جول ايرىعى -  الەمدەگى ەڭ قيىن جول ايرىق. ەكى دەڭگەيدە 34 ءورىلىم بولىپ جاتقان جولايرىقتىڭ ۇستىنەن كۇنىنە 630 مىڭنان اسا كولىك وتەدى ەكەن. ايقىش-ۇيقىش بولىپ جاتقان جولايرىقتان ءوز باعىتىڭنان اداسىپ كەتپەۋ وڭاي ەمەس. الىپ جولايرىقتىڭ قۇرىلىسى 1993 - جىلى بىتكەن.

ەڭ ۇزىن اۆتوماگيسترال

وتكەن عاسىردىڭ 20 -جىلدارىنان امەريكالىقتار الياسكا مەن ءچيليدى جالعايتىن جولدىڭ جوسپارىن جاساي باستايدى. ناتيجەسىندە ۇزاق جىلعى ەڭبەكتەن كەيىن «پانامەريكالىق شوسسە» پايدا بولادى. جالپى ۇزىندىعى 48 مىڭ شاقىرىمنان اساتىن اۆتوماگيسترال كەيبىر جەردە ۇزىلگەن. پاناما مەن كولۋمبيانىڭ اراسىنداعى ۇزىك 80 شاقىرىمدى قۇرايدى.

بۇل ايماقتا ادام اياعىنىڭ بارۋى قيىن، وسى ەلدەردىڭ ۇلتتىق قورىقتارى ورنالاسقان جەر. ەگەر وسى ۇزىكتى ساناماسا، بۇل شوسسە امەريكا قۇرىلىعىندا ورنالاسقان ەلدەردىڭ جول جەلىسىن ۇلكەن ءبىر جۇيەگە بىرىكتىرەدى. 15 مەملەكەتتىڭ تەرريتورياسىنان وتەتىن شوسسە ەڭ ۇزىن ماگيسترال رەتىندە گيننەس رەكوردتار كىتابىنا ەنگەن.

ال حيۋستون قالاسىنداعى كەتي فريۋاي شوسسەسى - كوپ جولاقتى جول. ونىڭ نەگىزى بولىگى 10 جولاقتى قۇراسا، كەيبىر جەرلەردە 26 جولاققا دەيىن كەڭەيەدى. سونىڭ ارقاسىندا بۇل شوسسە الەمدەگى كەڭ جول دەگەن اتاۋدى يەلەنگەن.

ەڭ تار كوشە

جالپى، اۆتوماگيسترالداردان بولەك، قالا ىشىندەگى كوشەلەردىڭ ىشىندە ەرەكشەلەرى دە كوپ. مىسالعا، سان-فرانسيسكو قالاسىنداعى لومبارد كوشەسىن ەڭ ادەمى كوشە دەپ اتاۋعا بولار. ويتكەنى كوشە بويىندا جاسىل جەلەك جايقالىپ تۇر. ءپىشىنى دە ەرەكشە. ال بولدۋين ستريت - گيننەستىڭ رەكوردتار كىتابىنا ەنگەن كوشە. ول مۇنداي قۇرمەتكە ءوزىنىڭ تىك قۇلاما پىشىنىمەن يە بولعان.

ال نەمىستىڭ Spreuerhofstrasse كوشەسى الەمدەگى ەڭ تار كوشە رەتىندە گيننەستەر كىتابىنا كىرگەن. ول رويتلينگەن قالاسىندا ورنالاسقان. ەنى بار-جوعى 31 سانتيمەرتدى قۇرايدى.

سونداي-اق انگليانىڭ ءبىر قالاسىندا الەمدەگى ەڭ تار كوشەنىڭ ءبىرى بار. ۇزىندىعى بار-جوعى 50 مەتردى قۇرايتىن پارلامەنت ستريتتىڭ ەنى 1 مەتردەن ءسال عانا اسادى. ءتىپتى كەيبىر جەردە كوشەنىڭ ەنى 0,64 مەتردەن اسپايدى ەكەن. جەرگىلىكتى تۇرعىندار كوشەنى كەڭەيتۋ تارالى قانشاما رەت ءوتىنىش بىلدىرگەنمەن، جەرگىلىكتى بيلىك قۇلاق اسا قويماعان سىڭايلى.

دايىنداعان ءۇمىتجان باكەلەكوۆا

«ايقىن»