شىنجاڭ ايماعىندا ساقتالعان كونە كۇيلەر ەلگە اكەلىندى

 استانا.قازاقپارات - تاريحى تەرەڭدە جاتقان كۇيشىلىك ونەرىمىزدىڭ ءبىر تامىرى قىتايدا جاتىر دەسەك بولادى. قازاقتىڭ كۇي ونەرىن زەرتتەپ جۇرگەن كۇيشى اردابي ماۋلەت ۇلى ارنايى ءىس ساپارمەن شىنجاڭ ولكەسىنە بارىپ قايتقان ەدى. نەگىزگى ماقساتى - كونە كۇيلەردى قايتا جاڭعىرتۋ.

 شىنجاڭ ولكەسى ىلە قازاق اۆتونوميالى وبلىسىندا تۇراتىن ايگىلى ءاشىم كۇيشىنىڭ ءتول شاكىرتى بۇگىندە 93 جاسقا كەلگەن يماش اسقاربەك ۇلى مەن 91 جاستاعى داۋلەسكەر كۇيشى كامال ماقاي ۇلىنان 30 عا تارتا ەسكى كۇيلەر مەن كۇيلەردىڭ اڭىز- اڭگىمەلەرىن جانە كۇيشى ۇران اقاتاي ۇلىنان دا 30 عا جۋىق بايىرعى كۇيلەر اۋديو تاسپاعا جازىلىپ الىندى.

قازاق راديوسىنىڭ «التىن قورىنا» ارنايى جىرشى- تەرمەشى ماعاۋيا بايمۇحامەت ۇلى مەن گۇلزينات ماعاۋيا قىزىنان 40 تان استام (اۋديو- ۆيدەو) جىر- تەرمە جازىلىپ الىندى. سونداي- اق جىرشى- تەرمەشى توقتاباي ءالىمقۇل ۇلىنان الاش اقىنى تاڭجارىق جولدى ۇلىنىڭ 4 ساعاتقا دەيىن سوزىلاتىن تولعاۋى دا تاسپاعا ءتۇسىپتى. ىلە قازاق اۆتونوميالى وبلىسىنا قاراستى تەكەس اۋدانىندا تۇراتىن نۇرىمباي سۇلەيمەن ۇلىنان قوجەكە كۇيشىدەن باستاپ سول وڭىردەگى ەسكى كۇيلەردەن 40 قا جۋىق (اۋديو- ۆيدەو) ماتەريال اكەلىندى.

 التاي- تارباعاتاي جەرىندە كونەدەن ساقتالعان حالىق كۇيلەرى جانە بەيسەنبى، قايراقباي كۇيلەرىنىڭ ەسكى نۇسقاسىن تارتاتىن شەجىرە كۇيشىلەر عالىم ءمادي ۇلى مەن وتان كاسىمباي ۇلىنان 1970-1980 - جىلداردا جازىلىپ الىنعان 50 دەن استام كۇيلەر مەن كۇي تاريحىنا قاتىستى دەرەكتەر دە تاسپاعا ءتۇسىپتى. سونىمەن بىرگە حالقىمىزدىڭ ءان- كۇي، جىر- تەرمە، اۋىز ادەبيەتىنە قاتىستى 1980 - جىلداردان باستاپ شىنجاڭ وڭىرىندەگى جانە بەيجىڭدە ءتۇرلى باسىلىمداردا جارىق كورگەن كوپتەگەن كىتاپتار دا ءبىزدىڭ كىتاپحانامىزعا كەلىپ قوسىلدى.

شىنجاڭ ولكەسى قىزىلسۋ قىرعىز اۆتونوميالى وبلىسىندا ءومىر سۇرگەن زاڭعار ماناسشى ءجۇسىپ ماماي ۇلى جىرلاعان قازاقتىڭ جەتى قاعانى تۋرالى بىرنەشە سەريالى ماتەريال دايىن تۇر. بۇل ماتەريالدار الداعى ۋاقىتتا قازاقستان ۇلتتىق ارناسى مەن قازاق راديوسىندا حالىققا جول تارتىپ، قازاق مادەنيەتىنىڭ التىن قورىندا ساقتالادى دەيدى اردابي ماۋلەت ۇلى. الداعى ۋاقىتتا ءىس ساپاردان اكەلىنگەن ولجامەن سىزدەردە تانىس بولاسىزدار.

سۋرەتتە ق ح ر شىنجاڭ ولكەسى، قىزىسۋ قىرعىز اۆتونوميالى وبلىسىنىڭ اقشي اۋدانىنداعى ايگىلى زاڭعار ماناسشى ءجۇسىپ ماماي ۇلىنىڭ شاكىرتتەرى سۇيىندىك جانە قومىزشى قالمامبەتپەن سۇحباتتاسى وتىرعان كۇيشى، فوللورتانۋشى اردابي ماۋلەت ۇلى.

baq.kz