00:12, 16 - قىركۇيەك 2014 | GMT +5
تۇركيا پرەزيدەنتى تايىپ ەردوعان جاڭا سارايعا كوشەدى
استانا. قازاقپارات - تۇركيا رەسپۋبليكاسىنىڭ 12- پرەزيدەنتى رەدجەپ تايىپ ەردوعان چانكاياداعى سارايىنان اتاتۇرىك ورمان شارۋاشىلىعى ماڭىندا بوي كوتەرگەن جاڭا رەزيدەنتسياعا كوشەدى.
بۇل تۋرالى تۇركياداعى مەنشىكتى ءتىلشى ەرجان ءجۇنىس حابارلايدى.
قۇرىلىسى 2012 - جىلى باستالعان مەملەكەتتىك ماڭىزدى نىسان سەلچۇك كەزەڭىنىڭ ساۋلەت ونەرىمەن تۇرعىزىلدى. ءۇش بلوكتان تۇراتىن عيماراتتا مىڭعا جۋىق بولمە مەن ءماجىلىس ورىندارى بار. سونداي- اق ول جاسىرىن تىڭداۋلار مەن قارۋلى شابۋىلدارعا قارسى قاۋىپسىزدىك شارالارى سوڭعى تەحنولوگيالارمەن كۇشەيتىلدى.
ال كۇنى كەشە تۇركيا پرەزيدەنتىنىڭ جاڭا رەزيدەنتسياسى «اقساراي» دەپ اتالاتىنى بەلگىلى بولدى. چانكاياداعى سارايعا ۇكىمەت جەتەكشىسى احمەت ءداۋىتوعلى ورىنباسارلارىمەن بىرگە 4 مينيستر كوشىپ بارماق. «جاڭا تۇركيا» ستراتەگياسىن جاريالاعان پرەزيدەنت تايىپ ەردوعان ۇلىقتاۋ راسىمىنەن سوڭ اۋەلى ۇشاعىن، ەندى مىنە جۇمىس ورنىن جاڭالادى.
www.24.kz
