بارسەلونادا تاكسي جۇرگىزۋشىلەرى قىتاي ءتىلىن ۇيرەنۋدە
مۇنداي قادامعا بارسەلونا جۇرگىزۋشىلەرى اسپاناستى ەلىنەن تۋريستەر اعىنى ەلەۋلى كوبەيە تۇسۋىنە وراي بولىپ وتىر. كۋرستى MyTaxi جولاۋشىلار تاسىمالداۋ كاسىبي جۇرگىزۋشىلەرى قاۋىمداستىعى مەن يسپانيادا قىتاي ءتۋريزمىن دامىتۋمەن اينالىساتىن Chinese Friendly International كومپانياسى ۇيىمداستىردى.
قىتاي تۋريستەرى جىل وتكەن سايىن كوبەيىپ وتىرعان جاعدايدا تاكسيستەر وسى ەلدىڭ ءتىلىن ۇيرەنۋگە ءماجبۇر، ايتپەسە نارىقتاعى ءوز ۇلەستەرىنەن ايىرىلىپ قالۋى مۇمكىن.
باستاپقى كۋرسقا كليەنتتەرمەن قارىم-قاتىناستاردا ءجيى پايدالانىلاتىن سوزدەر مەن ءسوز ورامدارى ەنگىزىلدى. ولارمەن ءتۇسىنىسۋ قيىن بولعان جاعدايدا تاكسيستەر سمارتفوندارعا جازىلعان قوسىمشالاردى پايدالانا الادى. سونىمەن قاتار ولار قىتايدىڭ مادەنيەتى مەن داستۇرلەرىنە قاتىستى نەگىزگى اقپاراتتاردى دا وقىپ-ۇيرەنۋدە. تاكسي جۇرگىزۋشىلەردىڭ تىلەگىنە وراي ولار قىتاي ءتىلىن ودان ءارى تەرەڭدەتە ۇيرەتەتىن تەگىن كۋرستارعا دا جازىلا الادى.
