مارستاعى قۇپيا كورىنىستەر

استانا. قازاقپارات - مارس - جەر شارىندا تىرشىلىك ەتۋ مۇمكىن بولماعاندا ادام بالاسى ءومىر ءسۇرۋى مۇمكىن جالعىز عالامشار بولىپ وتىر.

مارسوحودتار بۇل كۇنى مارسقا اتتانىپ، قىزىل عالامشاردى جان-جاقتى زەرتتەۋدە.

ءبىز بۇگىن مارستا تۇسىرىلگەن سۋرەتتەردە كەزدەسىپ، جەر بەتىن دۇرلىكتىرگەن ەڭ جۇمباق وبەكتىلەردى ءسوز ەتەمىز.

ادامنىڭ بەتى. بۇل وبەكتىڭ ەكىنشى اتاۋى -  مارس سفينكسى. 1976 - جىلى NASA تۇسىرگەن سۋرەتتە مارستا جاتقان ادامنىڭ بەتى انىق كورىنەدى. بۇل سۋرەتتى كورگەن بويدا الەم ءدۇر سىلكىنىپ، رەجيسسەرلەر بەتتى عىلىمي-فانتاستيكالىق فيلمدەرگە پايدالانا باستاعان. شىن مانىندە، بۇل «بەت» -  كيدونيا دەپ اتالاتىن مارس وڭىرىندەگى تومپەشىك.

تومپەشىك 1998 - جىلى انىقتالىپ قايتا تۇسىرىلگەن. 1976 - جىلى تۇسىرىلگەن سۋرەتتە تومپەشىك جارىق پەن كولەڭكە سالدارىنان ادام بەتىنە قاتتى ۇقساپ قالعان.

باقا مەن ادام ساۋساعى. امەريكالىق مارسوحود 2013 - جىلى تاس بولىپ قاتىپ قالعان باقانى ءتۇسىرىپ العان. ال 2012 - جىلى Curiosity كامەراسىنا ادامنىڭ بالان ۇيرەگى ىلىنگەن. ساۋساق تاستار اراسىنان جوعارى شىعىپ تۇرعان. عالىمدار بۇل ەكى وبەكت: باقا مەن ادام ساۋساعىن جوققا شىعاردى. ولاردىڭ ايتۋىنشا، بۇلار مارستا جاتقان تاستار عانا. تەك باقا مەن ساۋساققا ۇقساپ قالعانى بولماسا...

قار ادامى. Spirit مارسوحودى ادام ءمۇسىنى تۇرعان سۋرەتتى 2007 - جىلى تۇسىرگەن. سۋرەتتەن بىرەۋلەر ايەل ادامدى كورسە، ەندى بىرەۋلەر «سۋرەتتەگى - قار ادامى» دەگەندى ايتادى. ەندى ءبىر توپ بۇنىڭ مايمىل ەكەنىنە ءشۇباسىز سەنىمدى. تالاس ءالى تولاستار ەمەس.

مارس ەگەۋقۇيرىعى. 2013 - جىلى مارسوحود تۇسىرگەن سۋرەتتەن ەگەۋقۇيرىققا ۇقساس نارسە قىلاڭ بەرەدى. جەر بەتىندەگى ادامداردىڭ بۇل قۇبىلىسقا ءمان بەرگەنى سونشالىق، تۋيتتەردە ەگەۋقۇيرىققا ارنايى اككاۋنت اشىلعان. «ءوزىم تۋرالى» دەگەن جەرىنە: «جەر ادامدارى. سىزدەر مەنى تاپتىڭىزدار. باسىپ كىرۋىمىزگە دايىندالىڭىزدار» دەپ جازىلعان.

توقاش. 2014 - جىلدىڭ باسىندا مارسوحود ناعىز تىلسىم قۇبىلىستى جاريا ەتتى. ءبىر جەردى ەكى رەت سۋرەتكە تۇسىرگەندە، ەكىنشى سۋرەتتە كەنەتتەن توقاش پايدا بولادى. توقاش قايدان پايدا بولا قالدى؟ بۇل قانداي تىلسىم؟ مارس نەنى جاسىرادى؟ NASA بۇعان مىناداي جاۋاپ قايتاردى: بۇل «توقاش» مارسوحود قوزعالعان كەزدە شىنجىر تابانىنىڭ استىنان جىلجىپ كەتىپ سۋرەتكە ءتۇسىپ قالعان.

مارستاعى گۇل! بۇل بارىنەن قىزىق سەكىلدى. 2012 - جىلى كامەراعا ىلىنگەن گۇل تۋرالى الىپ-قاشپا ءسوز كوپ. عالىمدار ناقتى جاۋاپ بەرە الماسا دا، بۇنىڭ بيولوگيالىق وسىمدىك ەمەس ەكەنىنە 100 پايىز سەنىمدى. NASA بۇل وبەكت نە بولسا دا، ءتۇرلى قۇبىلىستاردىڭ اسەرىنەن پايدا بولعان دوڭەس شىعار دەپ ەسەپتەيدى. مۇنداي دوڭەستەر جەر بەتىندە دە بارشىلىق.

دايىنداعان: شاتتىق قالي

massaget.kz