ا ق ش رەسمي تۇردە سوعىس جاريالادى

استانا. قازاقپارات - بۇل جولى بەلگىلى ءبىر مەملەكەتكە ەمەس، "يسلام مەملەكەتى" لاڭكەستىك ۇيىمىنىڭ وكىلدەرىنە.

بۇل جايىندا ا ق ش پرەزيدەنتىنىڭ باسپا ءسوز حاتشىسى جوش ەرنەست مالىمدەدى دەپ حابارلايدى Agence France-sePres.

"امەريكا قۇراما شتاتتارى ءال-كايدامەن قوسا "يسلام مەملەكەتىمەن" دە سوعىساتىندىعىن جاريالايدى" دەدى ەرنەست.

بۇعان دەيىن 11 - قىركۇيەك كۇنى مەملەكەتتىك حاتشى جون كەرري تاياۋ شىعىسقا ءىس-ساپارمەن بارىپ، سەرىكتەس مەملەكەتتەردى جيھادشىلارمەن بىرىگە كۇرەسۋگە ۇگىتتەپ كەلگەن بولاتىن. الايدا، ول كەزدەسۋلەر بارىسىندا سوعىس تۋرالى جاق اشقان جوق. مەملەكەتتىك حاتشى بۇل جاعدايدى تەك اسكەري وپەراتسيا دەپ تۇسىنەتىندىگىن بىلدىرگەن.

ءدال وسى كۇنى پرەزيدەنت باراك وباما "يسلام مەملەكەتىمەن" كۇرەسۋدىڭ جاڭا ستراتەگياسىن كوپشىلىككە ۇسىنعان بولاتىن. ول يراكقا اسكەر كىرگىزبەيتىندىگىن مالىمدەدى. اسكەري شابۋىلدار تەك اۋەدەن جاسالادى.

Baq.kz