پاۆلودار وبلىسىنىڭ اكىمى قانات بوزىمبايەۆ رەسەيدەگى مەكتەپتەردە قازاق ءتىلىن ەنگىزۋدى ۇسىندى

استانا. قازاقپارات - رەسەيدىڭ ومبى ايماعىنداعى مەكتەپتەرگە قازاق ءتىلى ءپانىن ەنگىزۋ كەرەك. پاۆلودار وبلىسىنىڭ اكىمى قانات بوزىمبايەۆ كورشى ەلگە ارنايى ساپارى بارىسىندا وسىنداي ۇسىنىس ايتتى.

 ءوز كەزەگىندە ول ومبىداعى ءبىلىم وردالارىن قاجەتتى وقۋ- قۇرالدارىمەن قامتۋعا قول ۇشىن بەرۋگە ءازىر ەكەنىن جەتكىزدى.

 وتاندىق تاجىريبەنى مىسالعا كەلتىرگەن اكىم: «بۇگىندە قازاقستان مەكتەپتەرىندە ءۇش ءتىل قاتار وقىتىلادى. وقۋشىلار قازاق، اعىلشىن ءارى ورىس ءتىلىن مەڭگەرۋدە»، - دەگەندى دە قوستى.

 الايدا ومبىداعى قانداستارىمىزدىڭ باستى پروبلەماسى قازاق ءتىلدى كادرلاردىڭ جوقتىعىندا بولىپ وتىر. «سوندىقتان وسى ماسەلەنى ويلاستىرۋ قاجەت»، - دەدى قانات بوزىمبايەۆ. ايماق اكىمى ومبى وڭىرىندەگى ۇزدىك تۇلەكتەردى پاۆلوداردىڭ جوعارعى وقۋ ورىندارىندا ءبىلىم الۋعا شاقىردى.

 قانات بوزىمبايەۆ، پاۆلودار وبلىسىنىڭ اكىمى:

 وبلىستا 11 مەكتەپ بار ەكەن. سول 11 مەكتەپتە بالالار قازاق ءتىلىن وقيدى ەكەن. بالالاردىڭ سانى 300 ادام ەكەن. دياسپورانىڭ سانى 83 مىڭ ادام. ول تەك قانا رەسمي سيفر. ونىڭ ىشىندە 20 مىڭداي بالا. 15 مىڭ بالا مەكتەپتە وقيدى. 300 بالا عانا قازاق تىلىندە وقيدى. مەنىڭشە، كىشكەنە دۇرىس ەمەس سياقتى. سوندىقتان ماسەلەنى جۇيەلى تۇردە قولعا الۋ كەرەك.

 اسەمگۇل مۇحيت قىزى

«استانا» ارناسى