ون ءبىر جاسار ەمشى شىقتى
سال بوپ قالعان جانداردى اياققا تۇرعىزعان ەربوسىن بالالاردى سۇندەتكە دە وتىرعىزا بەرەدى ەكەن.
قىزىلوردا وبلىسىنا قاراستى ارالقۇم اۋىلىنىڭ وقۋشىسى ەربوسىن سەرىكبايەۆ قازىر مەكتەپكە بارمايدى. ايتۋىنشا، تۇسىندە بەلگىسىز قاريا ايان بەرىپ، ەمشىلىك قاسيەتتى قابىلداماي ءجۇرسىڭ دەپ جاۋاپقا العان ەكەن. سودان ەمشىلىك جولعا ءتۇسىپ، تۇسكە دەيىن ءبىر مەزگىل ۇيىندە وقىتىلادى. ەربوسىن سەرىكبايەۆ "تۇندە كادىمگى ومىردە ەمەس، بوتەن جاقتا جۇرەم. ادام ەمدەپ جاتام. مولالاردىڭ قاسىندا جۇرەم. ماعان ايتادى، سەنى تەك قانا ادام ەمدەۋ ءۇشىن عانا جىبەردىم دەيدى. سوسىن مەن وزىممەن ءوزىم جىلاي بەرەم، نەگە بۇيتەت دەپ"، - ويىمەن بولىسەدى بالا.
العاشقىدا بالانى جۇيكە جۇيەسى اۋرۋلارى اۋرۋحاناسىنا دا جاتقىزىپتى. ەكپەسىن ەكتىرمەي ول جاقتان قاشىپ شىققان ەربوسىن تاكسيگە مىنەدى. الايدا جولدا قۇلاعىنا "سىر ەلى، جىر ەلىنەن ءتۇسىپ قال، قاۋىپ ءتونىپ تۇر" دەگەن داۋىس كەلەدى. سويتسە، بالانىڭ سوقىرشەگى جارىلعالى تۇر ەكەن. وسىلايشا ون ءبىر جاسىندا ەمشىلىكتى قابىلداعان ەربوسىننىڭ اناسى ەندى ۇيدە ادام قابىلداۋ قيىنداپ بارادى دەيدى.
ال ەربوسىننىڭ اناسى داناگۇل جيرەنبايەۆا "ەندى ۋايىمدايمىن. مىسالى، قازىر ەشنارسە ەمەس. جيىرما وتىز ادامنان ارتىق قاراماي تۇرمىز بالاعا، جاعدايىنا بايلانىستى. كەلەسى جازدا ادام كوپ بولسا، مەن ۋايىمدايمىن. دىم ورىن جوق. تولپا ادام. ءبىرىن ءبىرى باسادى. حالىقتىڭ جاعدايى بولمايدى. ءبىزدىڭ دە جاعداي بولمايدى. بالا اۋىرىپ قالادى" دەيدى. ناۋقاسى اۋىر ازاماتتار ەربوسىننىڭ ەمىنەن كەيىن كادىمگىدەي ەمدەلىپ كەتكەندەرىن ايتادى. بۇرىن سوندى ەمشى-كورىپكەلدەرگە سەنبەيتىن كەي قىزىلوردالىقتار باسىنان وتكەن سوڭ، بۇل بالا تەگىن ەمەس دەپ وتىر. بالالارمەن ويناپ، مەكتەپكە بارعىم كەلەدى دەگەن ەربوسىن سەرىكبايەۆ وسى جىلدىڭ باسىندا اشىلعان قاسيەتى ءۇشىن ۇيىندە وتىرۋىنا تۋرا كەلەدى.
ال ون ءبىر جاسار بالانىڭ اتا-اناسى مەن ەمدەلۋشىلەرى بالانىڭ ەمشىلىكتى جالعاستىرۋى ءۇشىن ناۋقاستاردى قابىلداۋعا ىڭعايلى ءبىر ورىن بولسا ەكەن دەيدى.
NUR. KZ.
