جۇسىپبەك ايماۋىتوۆتىڭ ماسكەۋدەگى بەيىتىنە تۋعان جەرىنىڭ توپىراعى جەتكىزىلدى

پاۆلودار. قازاقپارات - جۇما كۇنى قازاقتىڭ زيالى قاۋىمىنىڭ ءىرى تۇلعاسى، اتاقتى قالامگەر، دراماتۋرگ، الاشوردا قايراتكەرى جۇسىپبەك ايماۋىتوۆتىڭ كىندىك قانى تامعان جەرىنەن ءبىر ۋىس توپىراق جازۋشى جەرلەنگەن ماسكەۋ قالاسىنداعى ۆاگانكوۆسكي زيراتىنا كومىلدى، دەپ حابارلادى پاۆلودار وبلىستىق اكىمدىگىنىڭ باسپا ءسوز قىزمەتىنەن.

ەسكە سالا كەتەيىك، رەپرەسسياعا ۇشىراعان قازاق جازۋشىسى ج. ايماۋىتوۆتىڭ جەرلەنگەن جەرى بيىل عانا بەلگىلى بولدى. 31- مامىردا ساياسي قۋعىن-سۇرگىن قۇرباندارىن ەسكە الۋ كۇنىندە وتكەن ميتينگتە وبلىس اكىمى قانات بوزىمبايەۆ جەرلەسى جەرلەنگەن جەرگە بارۋ باستاماسىن كوتەرگەن. ماسكەۋگە شىققان دەلەگاتسيا قۇرامىندا زيالى قاۋىم وكىلدەرى مەن جازۋشىنىڭ تۋعان-تۋىستارى بولدى.

ج. ايماۋىتوۆتىڭ نەمەرەسى ريما ايماۋىتوۆا مەن ق ر جازۋشىلار وداعىنىڭ مۇشەسى، جۋرناليست سايلاۋ بايبوسىن جيىلعان جۇرتشىلىققا قالامگەردىڭ ءومىرى مەن شىعارماشىلىعى تۋرالى بايانداپ بەردى.

19- قىركۇيەكتە ج. ايماۋىتوۆتىڭ 125 جىلدىق مەرەيتويىن اتاپ ءوتۋ كەزىندە پاۆلوداردا وبلىستىق قازاق مۋزىكالىق دراما تەاترى الدىندا جازۋشى ەسكەرتكىشى ورناتىلادى. سونىمەن قاتار مۇندا عىلىمي-پراكتيكالىق كونفەرەنتسيا ۇيىمداستىرىلماق.

سونداي-اق باياناۋىل اۋدانى مويىلدى القابىندا «ارداقتى الاش ازاماتى» اتتى مۋزىكالىق-ادەبي كەش پەن ۇلتتىق سپورت تۇرلەرىنەن جارىستار وتەدى.