اق اراقتان ءبىر بوساماي كەسەمىز، اركىمدەرگە كەتىپ جاتىر ەسەمىز

استانا. قازاقپارات - الماتى كوشەلەرىنە ىلىنگەن بيلبورد جۇرتشىلىقتىڭ نازارىن ەرىكسىز اۋدارىپ، قىزۋ تالقىعا تۇسە باستادى.

قالانىڭ كورنەكى ورىندارىنا قويىلعان جارنامالىق تاقتايشالارداعى سۋرەت الكوگولدى ىشىمدىكتەردى مولشەردەن تىس پايدالانعانداردىڭ بىرتە-بىرتە ادام كەيپىنەن ايىرىلىپ، شوشقاعا اينالاتىنىن بەينەلەيدى.

الەۋمەتتىك جوبا اۆتورلارى وسى يدەيا ارقىلى ماسكۇنەمدىكتىڭ اقىرى قايدا اپارىپ سوقتىراتىنىن ەسكە سالعىسى كەلگەندىكتەرىن ايتادى. بيلبورد ديزاينىن «ءبىزدىڭ تاڭداۋ» قوعامدىق قوزعالىسىنىڭ تاپسىرىسىمەن جەرگىلىكتى اۆتورلار جاساعان. ولاردىڭ ويىنشا، بۇل كارتينا ءبىر قاراعاندا كۇلكى شاقىرعانىمەن، كىم-كىمدى بولماسىن ءتۇبى ويلاندىرماي قويمايدى. «سالىنىپ ىشكەن ادام مەن شوشقانىڭ ايىرماشىلىعى از» دەگەن تۇجىرىمدى جەتكىزۋگە تىرىسقان.

قوعامدىق قوزعالىس وسىعان دەيىن ەكى ءىرى جوبانى جۇزەگە اسىرعان. كوكتەمدە ماس كۇيىندە كولىككە وتىرۋشىلارعا قارسى شىقسا، ىلە-شالا جاسى 21 گە تولماعان قىز-جىگىتتەرگە سپيرتتىك ونىمدەر ساتپاۋ تۋرالى باستاما كوتەردى. بۇل يگىلىكتى ءىستىڭ ارتىندا «باۋىرجان» قايىرىمدىلىق قورى تۇرعانىن ايتا كەتكەن ءجون. «الەۋمەتتىك جارنامانى ىلگەنىمىزگە كوپ ۋاقىت بولا قويعان جوق. ءبىراق قازىردىڭ وزىندە تۇرعىندار تاراپىنان ىستىق ىقىلاسقا يە بولدى. اراق -اتامىزدان قالعان اس ەمەس. قالىڭ بۇقارا بۇل كورىنىستى كورگەننەن كەيىن جامان ادەتتەن باس تارتىپ، سالاۋاتتى ءومىر سالتىن ۇستانادى دەگەن نيەتپەن جاسادىق.

قازىرگى تاڭدا دۇنيەجۇزىلىك دەنساۋلىق ساقتاۋ ۇيىمىنىڭ دەرەگى بويىنشا، ەلىمىز ورتا ازياداعى ىشىمدىكتى كوپ پايدالاناتىن مەملەكەتتەردىڭ الدىڭعى قاتارىندا تۇر. ءبىز وسى كورسەتكىشتى ازايتۋ ماقساتىندا كۇرەسىمىزدى جالعاستىرا بەرەمىز» دەيدى «باۋىرجان» قايىرىمدىلىق قورىنىڭ اتقارۋشى ديرەكتورى ەلميرا جومارتوۆا.
«ايقىن»