قازاق جىگىتى گووگل كومپانياسىنا جۇمىسقا تۇردى
ءازيزحانعا بىلتىر Facebook كومپانياسى دا شاقىرتۋ جىبەرگەن ەكەن. ءبىراق ونىڭ سول ۋاقىتتا جوعارى ءبىلىمى بولماعاندىقتان شەتەلگە ۆيزا اشا الماعانى سەبەپتى باس تارتۋعا ءماجبۇر بولىپتى.
2012 ACM ICPC بويىنشا الەم چەمپيوناتىنا قاتىسقان ق ب ت ۋ قۇراماسى
ول Google كومپانياسىنا قابىلدانعان سوڭ جاقىن ۋاقىتتا ارنايى شاقىرتۋدى كۇتىپ وتىرعانىن ايتادى. ا ق ش- تىڭ سان- فرانتسيسكو قالاسىندا ورنالاسقان باس شتابىندا جۇمىسىن جالعاستىرماق. ءازيزحان وندا باعدارلاما وڭدەۋدى قامتاماسىز ەتۋ مامانى (Software engineering) رەتىندە جۇمىس ىستەيتىن بولادى.
Facebook كومپانياسىندا تاجىريبە العان ازاماتتار
ءازيزحانعا نەلىكتەن Google كومپانياسىن تاڭداعانىن سۇراعانىمىزدا ول جاقتا قازاقستانداعىداي قاتىپ قالعان ءتارتىپ پەن رەسميلىكتىڭ جوقتىعى قىزىقتىراتىنىن ايتىپ ءوتتى. 22 جاستاعى ءازيزحان Google كومپانياسىندا قالىپ قويماي، بولاشاقتا شەتەلدەن ۇيرەنگەن تاجىريبەسىمەن ەلىمىزگە ورالىپ، وتاندىق جوبالارمەن اينالىساتىنىن دا ايتىپ وتىر. «ول جاقتا جۇمىس ىستەپ ءومىر بويىنا قالامىن دەپ ويلامايمىن. قازىر ءبىز ەندى عانا جوعارى ءبىلىم الدىق. كەيىن سول كومپانيادا قالىپ قويامىن دەپ ويلامايمىن. سەبەبى ءبىز ەلىمىزگە تاجىريبە جيناپ كەلىپ، ءارتۇرلى جوبالارمەن جۇمىس اينالىسۋىمىز كەرەك» دەيدى ول.
بەرليندە بيىل وتكەن Yandex Algorithm وليمپياداسىنىڭ اقتىق سىنى
ءازيزحان الماحان تاراز قالاسىندا تۋعان. تاراز قالاسىنداعى جامبىل قازاق- تۇركى مەكتەپ- ينتەرناتىن، كەيىن قازاق- بريتان تەحنيكالىق ۋنيۆەرسيتەتىنە وقۋعا تۇسكەن. ۋنيۆەرسيتەتتى وسى 2014 -جىلى بىتىرگەن. ول بالا كەزىنەن ينفورماتيكاعا قىزىعۋشىلىعى بولعانىن ايتادى. ءازيزحان ءۇيدىڭ ۇلكەنى، ونىڭ ەكى قارىنداسى جانە ءبىر ءىنىسى بار. ۇلكەن قارىنداسى قازاق- تۇرىك كوللەدجىندە وقيدى. ال ەراسىل ەسىمدى ءىنىسى ەندى عانا مەكتەپكە بارادى. ءۇيدىڭ كەنجەسى جانەركە بالالار باقشاسىنا بارادى.
اۆتور: ارداق قۇلتاي
massaget.kz
