قىتايدا اۋەندەردى قازاقى ناقىشتا ايتۋ سانگە اينالۋدا
ول شاڭحاي ۋنيۆەرسيتەتتەر اراسىنداعى انشىلەر بايقاۋىندا ءبىرىنشى ورىندى يەلەنگەن. ءبىز قىتايعا جاساعان ساپارىمىزدا قايسارمەن كەزدەسىپ، جاس انشىدەن سۇقبات الدىق.
- قايسار، ءوزىڭىز قاي جەردە تۋىلدىڭىز؟
- تارباعاتاي، چيحۋ قالاسىندا تۋىلىپپىن. بۇل قىتايدىڭ وڭتۇستىك- باتىسىندا.
- اتا- اناڭىز قاي جاقتان؟
- اتا- انام قۇلجا، كۇنەس اۋدانىنان. انام شيحۋىندا ايەلدەر بىرلەستىگىندە جۇمىس ىستەيدى. اكەم ەكى جاستا بولعانىمدا قايتىس بولىپ كەتتى.
- شاڭحايعا كەلگەنىڭىزگە قانشا ۋاقىت بولدى؟
- جالپى شاڭحايعا كەلگەنىمە ءتورت جىل شاماسى، ال ونىڭ الدىندا مەن نيمبو دەپ اتالاتىن شاعىن قالادا Sine High school- دە ءتورت جىل بويى ءبىلىم الدىم. شاڭحايدا كوبىنە قىتاي بالالارىمەن كوپ ارالاسقاندىقتان، ولاردان ءبىراز نارسە ۇيرەنىپ، كوزىم اشىلدى. دەمالىس كۇندەرى وسى شاڭحايداعى قانداستارىما ءجيى ات باسىن بۇرىپ تۇرامىن. مەن تىلدەسەتىن سول ون شاقتى وتباسى.
- بوس ۋاقىتىڭىزدا نەمەن اينالىساسىز؟
- ءان ايتقاندى ۇناتامىن.
- قانداي اندەر ايتقاندى ءجون كورەسىز؟
- مەن نەگىزىنەن وسى قازاقتىڭ حالىق اندەرىن قىتاي جۇرتىنا تۇسىنىكتىرەك بولۋ ءۇشىن قىتاي اۋەنىنە ماشىقتاپ ايتامىن. قازاقشا اۋەندەردى قوس تىلدە، ياعني قازاق جانە قىتاي تىلدەرمەن ارالاستىرىپ ورىندايمىن. "دۋداراي" ءانىن شىرقايمىن.
- "دۋداراي" تۋرالى قىتايداعى قانداستارىمىز ايتىپ ءجۇر دەگەندى ەستىگەنىمىز بار ەدى، وسى جونىندە نە ايتاسىز؟
- ءيا، راس. ول تاسقىن دەگەن اعامىز بولاتىن. تاسقىن پەكيندە وتكەن «Voice of China» باعدارلاماسىندا "دۋداراي" ءانىن ايتىپ وتە جاقسى كورسەتكىشكە جەتتى. قازىردە قىتايدا اۋەندەردى قازاقى ناقىشتا ايتۋ سانگە اينالۋدا.
- ءوزىڭىز قاتىسقان بايقاۋلار تۋرالى ايتا كەتسەڭىز؟
- شاڭحاي ۋنيۆەرسيتەتتەر اراسىنداعى انشىلەر بايقاۋىندا ءبىرىنشى ورىندى يەلەندىم. قازىرگى ۋاقىتتا شانشي ولكەسىندە بايقاۋ بولىپ جاتىر، سونىڭ توپ-20 سىنا كىردىم. كەيىننەن 20 انشىدەن 6 ءانشى ىرىكتەلەدى. بۇل بايقاۋ قىركۇيەك ايىنىڭ سوڭىنا دەين جالعاسادى.
- قازاقستانعا بارىپ كوردىڭىز بە؟
- وكىنىشكە وراي، بارمادىم. الايدا وتە قاتتى بارعىم- اق كەلەدى. ءبىزدىڭ ۋنيۆەرسيتەت ەۋرازيا ۇلتتىق ۋنيۆەرسيتەتىمەن تىعىز بايلانىستا بولعاندىقتان، مەنىڭ قىتاي ادەبيەتى بويىنشا باكالاۆر ماماندىعىنان كەيىن ماگيستراتۋرانى، بۇيىرتسا، سول جاقتا وقۋىما مۇمكىندىگىم بار. قازىر سوعان دايىندالىپ ءجۇرمىن. بىلايشا، شاڭحايدا استانا، الماتى، شىمكەنت قالالارىنان كەلىپ وقيتىن ۇل- قىزدارمەن جاقسى ارالاسامىن. ۋاقىتتى ءاردايىم بىرگە وتكىزەمىز. اسىرەسە ناۋرىز، قۇربان ايت مەرەكەلەرىن بىرگە تويلايمىز.
- اڭگىمەڭىزگە راقمەت!
سۇقباتتاسقان: روزا ەسەنقۇلوۆا
سۇقباتتى دايىنداعان: نۇربول نۇرماحان
massaget.kz
