اكىم جۇمىسقا شاقىرىپ جاتىر

استانا.قازاقپارات - قازاقستان پرەزيدەنتىنىڭ ۇكىمەتكە جۇرگىزگەن توسىن رەفورماسى ءبىراز شەنەۋنىكتى جۇمىسسىز قالدىرعانى بەلگىلى.

اياق استىنان جۇمىسىنان ايىرىلۋ كىم- كىمگە دە وڭاي تيمەسى انىق. مۇمكىن، ۇكىمەت قۇرامىنىڭ قىسقاراتىنىن ولار الدىن- الا ەستىگەن دە شىعار. ءسويتىپ، جۇمىس تابۋعا قامدانعان دا بولار. ءبىراق، قالاي دەگەنمەن دە بارىنە بۇرىنعىداي جۇمساق كرەسلو، كەڭ- مول سالقىن كابينەتتە وتىراتىن لاۋازىمدى قىزمەت تابىلۋى ەكىتالاي.

 شەنەۋنىكيا، ۇكىمەت قۇرىلىمدارىنىڭ قىسقارۋى بىلايعى جۇرت ءۇشىن وقىس جايت بولدى. بۇل جولعى رەفورمانى جوعارىداعىلار «ۇكىمەت قۇرامىن باسى ارتىق ورگانداردان ارىلتىپ، ىقشامدى قۇراممەن ۇتىمدى جۇمىس ىستەيتىن جاعدايعا كەلتىرەمىز» دەپ ءتۇسىندىردى. ءتيىمسىز ەكونوميكالىق وداقتاردىڭ قاقپانىنا ءتۇسىپ، سانكتسيالاردىڭ سالقىنى ءتيىپ جاتقاندا سولاي جاساۋعا ماجبۇرلىك تۋعان شىعار. رەفورمانىڭ ستراتەگيالىق جاقتان ءتيىمدى بولعان- بولماعانى ۋاقىت وتە بەلگىلى بولماق.

 سونىمەن بۇل رەتكى جويقىن قىسقارتۋدا (سولاي اتاۋعا تۋرا كەلىپ وتىر) 17 مينيسترلىك، 9 اگەنتتىك، 54 كوميتەت جانە 272 دەپارتامەنتتىڭ ورنىنا 12 مينيسترلىك پەن 30 كوميتەتتەن تۇراتىن جاڭا ۇكىمەت پايدا بولدى. جاڭاعى 9 اگەنتتىك مينيسترلىكتەردىڭ قۇرامىنا كىرىپ، كوميتەتەتكە اينالدى. ءيا، كەيبىر مينيسترلىكتەر ءبىر- بىرىنە قوسىلدى، قىسقارعان قۇرىلىمداردىڭ بارلىق قىزمەتكەرلەرى دالادا قالدى دەۋدەن اۋلاقپىز. الايدا جوعارىداعى ساندارعا قاراپ وتىرىپ، قانشاما ادامداردىڭ جۇمىسسىز قالعانىن كورۋ قيىن ەمەس. دەپارتامەنت باسشىلارىن بىلاي قويعان كۇننىڭ وزىندە، بۇرىنعى ءبىراز مينيسترلەر مەن اگەنتتىك ءتوراعالارى دا قايدا بارارلارىن بىلمەي الاسۇرىپ قالعانى انىق. ءىشىنارا جاڭا قىزمەتكە تاعايىندالىپ جاتقاندارى بار، دەسە دە ءبىراز تانىمال شەنەۋنىكتەردىڭ ازىرشە قىزمەتكە ورنالاسقان- ورنالاسپاعانى، اۋەلى ورنالاساتىن- ورنالاسپايتىنى دا بەلگىسىز.

وسى جاعدايدى ايقىن تۇسىنگەن بولۋ كەرەك شىعىس قازاقستان وبلىسىنىڭ اكىمى بەردىبەك ساپاربايەۆ استاناداعى ەكى قولدارى بوس قالعان شەنەۋنىكتەردى وبلىسقا جۇمىسقا شاقىردى. ايماقتا قىزمەت ەتسە استانالىق كادرلار ءۇشىن ۇلكەن تاجىريبە الاڭى بولار ەدى. ولار استانادا كابينەتتە وتىرىپ كورمەگەن تالاي نارسەمەن وبلىستا بەتپە- بەت كەلىپ، بىلىكتىلىگى مەن تاجىريبەسىن ارتتىرادى دەيدى ش ق و اكىمى. ورىندى ءۋاج ەكەنىندە داۋ جوق. اكىمدەر قاتارىنداعى رەيتينگى جوعارى، حالىق اراسىندا ىسكەر دە بىلىكتى اكىم اتىمەن تانىمال ب. ساپاربايەۆ ولاردى كەكەتىپ وتىرعان جوق، قايتا جاقسى نيەتىن ءبىلدىرىپ وتىر. بىرىنشىدەن جۇمىس ۇسىنۋدا، ەكىنشىدەن قىزمەتتىك كاررەراسىن جالعاستىرۋعا مۇمكىندىك سىيلاپ، جەرگىلىكتى جەردە شىڭدالۋعا شاقىرىپ جاتىر.

ەستەرىڭىزدە بولسا كەيبىر جاپ- جاس بۇلا شەنەۋنىكتەردىڭ بىلدەي مينيسترلىك پەن اگەنتتىكتەردىڭ باسىنا قونجيىپ العانىن جانە ولاردىڭ ءتيىمدى قىزمەت ىستەپ جارىتپاعانىن كورگەن پرەزيدەنت ن. نازاربايەۆ بىرەر جىل بۇرىن ولاردى ايماقتارعا جىبەرىپ، تاجىريبەدەن وتكىزۋ كەرەك دەگەن. سوعان ساي ساناۋلى شەنەۋنىكتەر تومەن قىزمەتتەرگە تۇسىرىلگەن دە. ەندى مىنە سول كەزدە جەرگىلىكتى جەرلەرگە بارۋعا ۇلگەرە الماعاندارعا ۇلكەن وراي تۋدى. ءبىز دە ولاردى كەكەتىپ وتىرعان جوقپىز. قايتا ايماقتارداعى مەملەكەتتىك قىزمەت سالاسىنا كومەك كورسەتىپ، جەرگىلىكتى اكىمشىلىك قۇرىلىمدارىنا تىڭ، جاڭا ەپكىن سىيلايدى دەپ قۋانىپ وتىرمىز. وبلىس، اۋدانداردا اتقارىلماي، باسى- بار اياعى جوق كۇيى جاتقان شارۋالار كوپ ەكەنى انىق. قىسقارعان قۇرىلىمداردىڭ ارقاسىندا قىزمەتسىز قالعان شەنەۋنىكتەر استانادان ورىن شىعار ما ەكەن دەپ جاۋتاڭداعانشا، جەرگىلىكتى جەردە حالىققا ەڭبەك ەتىپ، ەلدىڭ كوركەيۋىنە ۇلەس قوسسا جاقسى بولار ەدى. باستىسى، قايدا قىزمەت ەتۋدە ەمەس، قالاي قىزمەت ەتۋدە. مەملەكەتتىڭ دامۋىنا قالادا وتىرىپ قانا ەمەس، ايماقتا قىزمەت اتقارىپ تا ۇشان- تەڭىز ۇلەس قوسۋعا بولادى- اۋ دەگەن ويدامىز.

 ايتپاقشى، ب. ساپاربايەۆتىڭ باستاماسىن باسقا اكىمدەر دە قولداپ، استانادا بوس جۇرگەن كادرلاردى ءوز وبلىستارىنا جۇمىسقا شاقىرسا دەگەن وي دا جوق ەمەس.

 مۇرات الماسبەك ۇلى 
qiyan.kz