استاناداعى تەلەارنا قىزمەتكەرى بەس ادامدى اجالدان اراشالاپ قالدى

استانا. قازاقپارات - وزگەنىڭ ءومىرى ءۇشىن ءوز ءومىرىن قاتەرگە تىككەن ازامات.

استانا تۇرعىنى ەربول قۇدابايەۆ 5 بىردەي بالانى قىزىل جالىننان قۇتقارىپ، اجال اۋىزىنان امان الىپ قالدى.

ول ورتەنىپ جاتقان ساياجاي ىشىنەن كامەلەتكە تولماعان ءتورت بالا مەن جاس انانى الىپ شىققان، - دەپ حابارلايدى جەتىنشى ارنا.

ەربول قۇدابايەۆ قوناققا بارىپ، بەس بىردەي ادامنىڭ ءومىرىن قۇتقارىپ قالامىن دەپ استە ويلاماعان. داستارحان باسىندا وتىرعان ول كەنەت كورشى ۇيدەن شىققان جويقىن جارىلىستىڭ دىبىسىن ەستىپتى. وقيعا ورنىنا بارعان بەتتە قىزىل جالىنعا ورانعان ساياجايداعى ءۇيدىڭ ىشىنەن كومەككە شاقىرعان بالالاردى كورىپ، ءوز ۇستىنە سۋ قۇيىپ جىبەرىپ، تەرەزەدەن شىعارىپ العان.

ەربول قۇدابايەۆ، قالا تۇرعىنى:

- كومىر قورادان ەسىگىن بۇزىپ الىپ، قالقان قىلىپ اكەپ، سونى نەتىپ بۇزىپ اشىپ، قۇتقاردىق. بەس ادام شىقتى ىشىنەن. ءۇش قىز بالا، ءبىر كىشكەنتاي بالا 5 ايلىق جانە 6 جاسار بالا.

كۋاگەرلەردىڭ ايتۋىنشا، ءتىلسىز جاۋ ءۇيدىڭ توبەسىنەن شىعىپ، كىرە بەرىسكە جايىلعان. جالىن بار دۇنيە-مۇلىكتى كۇلگە اينالدىرىپتى.

تالعات ءۋالي، ءتىلشى:

- جالىننىڭ كۇشتى بولعاندىعى سونشالىق ءۇي ىشىندەگىلەردى شىعارۋدىڭ ءوزى ءبىراز قيىندىققا سوققان. ال كيىم-كەشەك پەن قۇجاتتار تولىعىمەن جانىپ كەتىپتى.

جالدامالى ءۇي قىزىل جالىنعا ورانعان كەزدە ءورت قۇرساۋىندا قالعان بۇلدىرشىندەردىڭ ءبىرى كىشكەنتاي مۇحاممەد. بالاقاي قولىنداعى ويىنشىعىنىڭ ارقاسىندا امان قالىپتى.

مۇحاممەد سابيۋللين:

- ءورت بولعان كەزدە بالاعا قاراپ تۇردىم. سوسىن تۇنشىعىپ قالماس ءۇشىن ايۋىمنىڭ ۇستىنە جاتتىمداعى اۋىزىمدى جاۋىپ تۇردىم. تاتەلەرىمە قاراپ تۇردىم نە ىستەپ جاتقانىن. سوسىن ولار شىققاندا مەن دە شىقتىم. قاسىمدا پەرىشتە بولعانىن كوردىم ءوزىم.

قازىر ورتتەن امان قالعان وتباسى ۋاقىتشا تانىستارىنىڭ ءبىر بولمەسىن پانالاپ وتىر. ۇستەرىندەگى كيىمدەرىنەن باسقا ءىلىپ الار ەشتەڭەسى قالماعان. دەسەدە جالعىز باستى انا بالالارىنىڭ امان قالعاندىعىنا تاۋبە دەپ وتىر.

مينيرا مىرزاعاليەۆا:

- بىرىنشىدەن قۇدايعا، ەكىنشى ەربول اعامىزعا راحمەت. بەس بالامىزدى امان الىپ قالعانىنا. جاعداي جوق. باراتىن جەرىمىز جوق.

قازىر مينيرا مىرزاعاليەۆانىڭ وتباسىنا كومەك قاجەت. قارجىلاي نەمەسە زاتتاي جاردەمدەسەمىن دەيتىن قايىرىمدى جاندار بولسا، كومەك قولىن سوزۋىنا بولادى.

بەس ادامدى اجالدان اراشالاپ قالعان ەربول قۇدابايەۆ مەملەكەتتىك ناگراداعا ۇسىنىلۋى مۇمكىن. استانا قالاسى توتەنشە جاعدايلار دەپارتامەنتىنىڭ ماماندارى قازىر ماراپاتتاۋ ماسەلەسىن ناقتىلاۋدا ەكەن. قالاي بولعان دا، مۇنداي ەرلىكتىڭ ەسكەرۋسىز قالمايتىنىن ايتىپ وتىر. ايتا كەتۋ كەرەك، ەربول قۇدابايەۆ -  «جەتىنشى ارنانىڭ» قىزمەتكەرى.

tv7.kz